Latest Telugu News | Breaking News Telugu | Telugu News Today | News in Telugu

సంపాదకీయం

Facebook Share Twitter Share Comments Telegram Share
తీర ప్రాంతాల గుండెకోత

ముమ్మరిస్తున్న పెను ప్రమాదం

నిత్యం అలల హోరుతో పోటెత్తే సముద్రం పోనుపోను పెద్ద మొత్తంలో తీర ప్రాంతాన్ని కబళిస్తోంది. స్థానిక ప్రజలకు ఇది పెను శాపంగా పరిణమిస్తోంది. ఆంధ్రప్రదేశ్‌లో తీర ప్రాంతం తీవ్ర స్థాయిలో క్రమక్షయానికి గురవుతున్నట్లు భూ విజ్ఞాన మంత్రిత్వ శాఖ పరిధిలోని జాతీయ తీరప్రాంత పరిశోధన కేంద్రం (ఎన్‌సీసీఆర్‌) తాజాగా వెల్లడించింది. దేశంలో గుజరాత్‌ తరవాత పొడవైన తీర ప్రాంతం కలిగిన రెండో రాష్ట్రం ఆంధ్రప్రదేశ్‌. దీనికి దాదాపు వెయ్యి కిలోమీటర్ల తీరం ఉంది. ఇందులో సుమారు 290 కిలోమీటర్ల మేర భిన్న స్థాయిలో క్రమక్షయ ప్రమాదం ఎదుర్కొంటున్నట్లు ఎన్‌సీసీఆర్‌ వెల్లడించింది. గత 28 ఏళ్లలో తీర ప్రాంతాల్లో చోటుచేసుకొన్న మార్పులను ఉపగ్రహ సమాచారం ఆధారంగా విశ్లేషించి ఈ అంచనాకు వచ్చింది. నెల్లూరు, ప్రకాశం, గుంటూరు, తూర్పు గోదావరి జిల్లాల్లో ఈ పరిణామం అధికంగా ఉన్నట్లు ఎన్‌సీసీఆర్‌ వెల్లడించింది. కృష్ణా, గోదావరి డెల్టా ప్రాంతాల్లో తీర ప్రాంత క్రమక్షయం, ఇసుక మేటల సమస్యలు మరింత అధికంగా ఉన్నాయి. ఏపీలో 488 కిలోమీటర్ల మేర తీర ప్రాంతంలో ఇసుక మేటలు పెరగ్గా, 250 కిలోమీటర్ల తీరం స్థిరంగా ఉంది. ఈశాన్య తీరంలో శ్రీకాకుళంలోని ఇచ్చాపురం నుంచి విశాఖపట్నంలోని భీమునిపట్నం వరకు గణనీయ పరిణామాలు చోటుచేసుకొంటున్నట్లు ఎన్‌సీసీఆర్‌ పేర్కొంది.

ఎన్‌సీసీఆర్‌ పరిశీలన మేరకు ఇండియాలో 32శాతం తీర ప్రాంతం భిన్న స్థాయిల్లో కోతకు గురవుతోంది. 27శాతం తీరంలో మట్టి మేటలు కనిపిస్తున్నాయి. మిగిలిన 41శాతం స్థిరంగా ఉంది. పశ్చిమ్‌ బంగలో పరిస్థితి మరింత ఘోరంగా ఉంది. ఈ రాష్ట్రానికి 534 కిలోమీటర్ల తీర ప్రాంతం ఉంది. ఇందులో 60శాతం కోతకు గురవుతోంది. కేంద్రపాలిత ప్రాంతం పాండిచ్చేరిలో సైతం ఇదే పరిస్థితి నెలకొంది. కేరళ, తమిళనాడుల్లోనూ నలభై శాతానికి పైగా తీరాన్ని సముద్రం కబళిస్తోంది. అల్పపీడనాలు, తుపానులు, సునామీలు వంటివి సంభవించినప్పుడు సముద్రం కల్లోలంగా మారి అలలు పోటెత్తుతాయి. దీని వల్ల తీర ప్రాంతం క్రమక్షయానికి గురవుతోంది. ఇటీవలీ కాలంలో భూతాపం కారణంగా ధ్రువప్రాంతాల్లో మంచు వేగంగా కరిగిపోతూ సముద్ర మట్టాలు పెరుగుతున్నాయి. తుపానులు సైతం అధికమవుతున్నాయి. తీర ప్రాంతం మరింతగా కోతకు గురవడానికి ఇవి కారణభూతమవుతున్నాయి. దేశంలో ముంబై, చెన్నై, కోచి, విశాఖపట్నం, మంగళూరు వంటి నగరాలు కడలి ఒడ్డునే ఉన్నాయి. సముద్రమట్టాలు పెరగడం వల్ల ఈ శతాబ్దం చివరినాటికి వీటిని మూడు అడుగుల మేర నీరు ముంచేస్తుందని వాతావరణ మార్పులపై అంతర ప్రభుత్వాల ప్యానల్‌ (ఐపీసీసీ) ఇటీవల హెచ్చరించింది. ప్రపంచవ్యాప్తంగా సముద్రమట్టాలు ఏటా ప్రస్తుతం 3.7 మిల్లీమీటర్ల మేర పెరుగుతున్నట్లు అంచనా.

సముద్ర అలల ఉద్ధృతికి, మృత్తికా క్రమక్షయానికి మడ అడవులు, పగడపు దీవులు, ఉప్పునీటి కయ్యలు సహజ రక్షణ కవచాలుగా నిలుస్తాయి. చేపలు, రొయ్యల చెరువుల పేరుతో మడ అడవుల నిర్మూలన విచ్చలవిడిగా సాగుతోంది. నౌకాశ్రయాల ఏర్పాటు, మైనింగ్‌, ఇసుక తవ్వకాలు, పర్యాటక ప్రాంతాల అభివృద్ధి పేరుతోనూ తీరాల్లో విచ్చలవిడి కార్యకలాపాలు సాగుతున్నాయి. ఫలితంగా కొన్ని చోట్ల కడలి ఒడ్డు క్రమక్షయానికి గురవుతుంటే, ఇతర చోట్ల ఇసుక మేటలు పెరిగిపోతున్నాయి. వీటి కారణంగా కొన్ని ప్రాంతాల్లోని సరస్సులు, కయ్యలలోకి సముద్ర నీటి ప్రవాహం తగ్గిపోయి వాటిలోని జీవజాలం తీవ్రంగా ప్రభావితం అవుతోంది. తీరం కోతకు గురై సముద్రం ముందుకు చొచ్చుకొస్తుండటం వల్ల మత్స్యకారుల జీవనంపై తీవ్ర ప్రభావం పడుతోంది. వారు తమ ఆవాసాలను కోల్పోయి నిరాశ్రయులుగా మిగలవలసి వస్తోంది. ఆంధ్రప్రదేశ్‌ నెల్లూరు జిల్లాలో పులికాట్‌, గోవుండ్లపాలెం, కృష్ణాజిల్లా సొర్లగొంది, తూర్పుగోదావరి జిల్లాలోని సూరసాని యానాం, గాడిమొగ, ఉప్పాడ, విశాఖపట్నం జిల్లాలోని చేపలప్పడ తదితర ప్రాంతాల్లో క్రమక్షయం అధికంగా ఉంది. ఉప్పాడలో సముద్రం నానాటికీ ముందుకు చొచ్చుకొస్తూ అక్కడి ఆవాసాలను మింగేస్తుండటంతో స్థానికలు బిక్కుబిక్కుమంటూ జీవనం వెళ్ళదీస్తున్నారు. రాబోయే రోజుల్లో ఈ విధ్వంసాన్ని నివారించాలంటే మడఅడవులను పెంచి, వాటిని సంరక్షించాలి. భూతాపాన్ని తగ్గించేందుకు అంతర్జాతీయ సమాజం నడుంబిగించాలి. జాతీయ సుస్థిర తీరప్రాంత నిర్వహణ కేంద్రం, సెంట్రల్‌ వాటర్‌ కమిషన్‌ సైతం తీర ప్రాంత మార్పులు, వాటి ప్రభావంపై అధ్యయనం చేస్తున్నాయి. కేవలం అధ్యయనాలతో సరిపెట్టకుండా క్రియాశీల కార్యాచరణకు రూపకల్పన జరగాలి. ప్రపంచ దేశాలు క్రమక్షయ నివారణకు అనుసరిస్తున్న విధానాలపై అధ్యయనం చేయాల్సిన అవసరం ఉంది. తీర ప్రాంత రక్షణ విషయంలో దేశంలోని ప్రఖ్యాత విజ్ఞాన సంస్థల పరిశోధకుల భాగస్వామాన్నీ పెంచాలి. అప్పుడే రాబోయే రోజుల్లో సముద్రం తీరప్రాంతాన్ని భక్షించకుండా కొంతవరకైనా నిలువరించడం సాధ్యమవుతుంది.

- ఎం.అక్షర


+

© 1999- 2022 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 040 -
23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.