Trump: సీఎన్‌ఎన్‌పై ట్రంప్‌ ₹3,867 కోట్ల పరువునష్టం దావా.. ఎందుకంటే?

వాషింగ్టన్‌: అమెరికా మాజీ అధ్యక్షుడు డొనాల్డ్ ట్రంప్ సోమవారం ప్రముఖ వార్తా సంస్థ సీఎన్‌ఎన్‌పై కోర్టులో పరువు నష్టం దావా వేశారు. తనపై సీఎన్‌ఎన్‌ అసత్య ప్రచారానికి పాల్పడుతున్నట్లుగా ఆరోపించిన ఆయన 475 మిలియన్‌ డాలర్ల (దాదాపు రూ.3,867.71 కోట్లు) నష్టపరిహారాన్ని కోరారు. భవిష్యత్తులో తాను అధ్యక్ష బరిలో దిగే అవకాశాలను దెబ్బతీసేలా సీఎన్‌ఎన్‌ తప్పుడు కథనాలను ప్రసారం చేస్తోందని ఆరోపించారు. ఈ మేరకు ఫ్లోరిడా డిస్ట్రిక్ట్‌ కోర్టులో దావా వేశారు. 2020లో తాను పోటీ చేసిన అధ్యక్ష ఎన్నికల సమయంలో ‘ది బిగ్‌ లై’ పేరిట సీఎన్‌ఎన్‌ నిర్వహించిన ప్రచారం.. తనకు నష్టం కలిగించిందని పేర్కొన్నారు.

అధికారంలో ఉన్న సమయంలో ట్రంప్‌ సీఎన్‌ఎన్‌పై తరచూ విమర్శలు చేస్తుండేవారు. ట్రంప్‌ గతంలోనూ పలు బడా టెక్‌ కంపెనీలపై దావా వేశారు. కానీ, చాలా తక్కువసార్లు ఆయనకు అనుకూలమైన తీర్పు వచ్చింది. 2021 జనవరి 6న క్యాపిటల్‌ హిల్‌పై జరిగిన దాడి అనంతరం ట్విటర్‌ ఆయన్ను ఆ సామాజిక మాధ్యమం నుంచి తొలగించిన విషయం తెలిసిందే. ఆ నిర్ణయాన్ని సవాల్‌ చేస్తూ అప్పుడు కూడా ఆయన కోర్టును ఆశ్రయించారు. కానీ, కాలిఫోర్నియా కోర్టు ఆయన వ్యాజ్యంపై వాదనలు వినడానికి నిరాకరించింది.

‘ది బిగ్‌ లై’ పేరిట సీఎన్‌ఎన్‌ జరిపిన దుష్ప్రచారంలో దాదాపు 7,700 సార్లు తన గురించి ప్రస్తావించారని ట్రంప్‌ తన దావాలో పేర్కొన్నారు. ప్రజల్ని భయకంపితుల్ని చేయడానికే వారు అలా చేశారని ఆరోపించారు. ఈ తరహా ప్రచారం నిర్వహిస్తున్న మరికొన్ని ఛానళ్లపై కూడా తాను దావా వేస్తానని చెప్పారు.


మరిన్ని

ap-districts
ts-districts

సుఖీభవ

చదువు