ఓఎన్‌జీసీ చమురు క్షేత్రాల్లో వాటా ప్రైవేటుకు! - Oil ministry tells ONGC to sell oilfields
close

Updated : 26/04/2021 07:20 IST
Facebook Share Twitter Share WhatsApp Share Telegram Share Link Share

ఓఎన్‌జీసీ చమురు క్షేత్రాల్లో వాటా ప్రైవేటుకు!

దిల్లీ: చమురు ఉత్పత్తి క్షేత్రాల్లో వాటాను ప్రైవేటు కంపెనీలకు విక్రయించాలని ఓఎన్‌జీసీకి చమురు మంత్రిత్వ శాఖ సూచించింది. అలాగే కేజీ క్షేత్రాల్లో విదేశీ భాగస్వాములను తెచ్చుకోవాలని; ప్రస్తుత మౌలిక వసతులను నగదీకరించుకోవాలని; డ్రిల్లింగ్‌, ఇతర సేవలను ప్రత్యేక కంపెనీకి బదిలీ చేసి ఉత్పత్తి పెంచుకోవాలని కూడా తెలిపింది. ఆ మేరకు ‘ఓఎన్‌జీసీ వే ఫార్వర్డ్‌’ పేరిట ఒక ఏడు సూత్రాల ప్రణాళికను ఏప్రిల్‌ 1న ఓఎన్‌జీసీ ఛైర్మన్‌, ఎండీ సుభాశ్‌ కుమార్‌కు పెట్రోలియం, సహజ వాయువు మంత్రిత్వ శాఖలోని అదనపు కార్యదర్శి(తవ్వకం) అమర్‌ నాథ్‌ లేఖ రాశారు. తద్వారా 2023-24 కల్లా చమురు, గ్యాస్‌ ఉత్పత్తిని మూడో వంతు పెంచుకోవచ్చని అందులో తెలిపారు. పన్నా-మక్తా, రత్న, ఆర్‌ సిరీస్‌ వంటి క్షేత్రాల్లో వాటాను విక్రయించాలని, పనితీరు సరిగా లేని క్షేత్రాలను ప్రైవేటు కంపెనీలకు అప్పగించాలని వివరించారు.
మూడో ప్రయత్నమిది: ఓఎన్‌జీసీకి చెందిన చమురు, గ్యాస్‌ క్షేత్రాలను ప్రైవేటీకరించడానికి మోదీ ప్రభుత్వం చేస్తున్న మూడో ప్రయత్నం ఇది. అక్టోబరు 2017లోనూ 15 క్షేత్రాలను ప్రైవేటు కంపెనీలకు అప్పగించాలని ప్రయత్నించారు. అయితే ఓఎన్‌జీసీ నుంచి తీవ్ర వ్యతిరేకత రావడంతో ఆ ప్రతిపాదనను విరమించారు. ఆ తర్వాతి ఏడాది సైతం 149 చిన్న, మధ్య స్థాయి క్షేత్రాలను ప్రైవేటు, విదేశీ కంపెనీలకు ఇవ్వడానికి గుర్తించారు. ఫిబ్రవరి 19, 2019న 64 మధ్య స్థాయి క్షేత్రాలను విక్రయించడానికి యత్నించినా.. టెండర్లకు పెద్దగా స్పందన రాలేదు. 2020-21లో ఓఎన్‌జీసీ 20.2 మిలియన్‌ టన్నుల చమురును ఉత్పత్తిని చేయగా.. అంతక్రితం ఏడాది 21.1 మి. టన్నులను ఉత్పత్తి చేయగలిగింది.


మరిన్ని

మీ ప్రశ్న

సిరి జవాబులు

మరిన్ని
తాజా వార్తలు
మరిన్ని