విజ్ఞానానికి చుక్కాని!

కెరీర్‌ గైడెన్స్‌

విజ్ఞానానికి చుక్కాని!

నీళ్లలో ఎలా ఈదాలో తెలిసుండటం విజ్ఞానం. నిజంగా ఈదగలగడం నైపుణ్యం! ఈ రెండింటిలో ఏది ముఖ్యం? రెండూ అవసరమే. దేనినైనా ముందు తెలుసుకుని ఆపై నేర్చుకోవాలి. అలాగే విజ్ఞానం వేరు, విజ్ఞత వేరు. విజ్ఞానాన్ని ఎక్కడ, ఎప్పుడు ఉపయోగించాలో తెలుసుండటమే విజ్ఞత.
అణుశక్తిని వినాశానికైనా, మానవ వికాసానికైనా ఉపయోగించవచ్చు. దేనికి వాడాలన్నది విజ్ఞతపై ఆధారపడి ఉంటుంది. అందుకే విజ్ఞత ఒక జీవన నైపుణ్యంగా విరాజిల్లుతోంది. విజ్ఞానానికి తోడు వివేకాన్ని సంతరించుకున్నవారిని ఈ నైపుణ్యం సమూహం నుంచి వేరుగా నిలబెడుతుంది.

ఏం చేయాలి?

బంగారానికి గోడ చేర్పులా విజ్ఞానానికి చుక్కానిలా వినియోగపడే విజ్ఞత నైపుణ్యాన్ని అలవరచుకోవచ్చా? సాలోచనతో సాధన ద్వారా విజ్ఞత అలవరచుకునే ప్రయత్నం చేయవచ్చు.
సమన్వయం: చాలా సందర్భాల్లో మెదడు సంకేతాలు ఒకలా, మనసు చెప్పేది మరోలా ఉంటాయి. రెండింటి సమన్వయమో, ఆ సందర్భాల్లో దేనివైపు మొగ్గాలో నిర్ణయించుకోవడం అలవాటు చేసుకోవాలి.
విశాల దృక్పథం: విశ్వదృష్టి, మానవత్వం, లౌకిక విలువలు, వివిధ జీవన రంగాల్లో ఉన్నత ప్రమాణాలపై తగిన అవగాహన పెంచుకోవడం ద్వారా ఆర్జించిన విజ్ఞానానికి తోడు విజ్ఞత ఏర్పడుతుంది.
జీవిత చరిత్రలు: ప్రముఖుల జీవితచరిత్రలు, వారి జీవనయానంలో వివిధ దశల్లో జరిగిన సంఘటనలు, వారి స్పందన, అనుభవాలను తెలుసుకునే ప్రయత్నం చేస్తే విజ్ఞత చూపాల్సిన ఉన్నత సందర్భాలు బోధపడతాయి. అవి నిత్యజీవితంలోనూ ప్రతిబింబిస్తాయి.
సాదాసీదా మనుషులను అసామాన్యులుగా వెలుగులవైపు నడిపిన విజ్ఞత జీవన నైపుణ్యంగా విరాజిల్లుతోంది. అగోచరమైన ఈ నైపుణ్యాన్ని గుర్తించడం, సాధన చేయడమే భవిష్యత్తు జీవితానికి రక్ష!

- యస్‌.వి. సురేష్‌

Tags :