‘చిత్రం’ సినిమాతో చిత్రసీమలోకి మెరుపులా దూసుకొచ్చిన దర్శకుడు తేజ. కొత్తదనం నిండిన కథతో కొత్త ప్రతిభను తెరకు పరిచయం చేస్తూ.. ఉషాకిరణ్‌ మూవీస్‌ నిర్మించిన ఈ సినిమా అప్పట్లో ఘన విజయాన్ని అందుకుంది. దీంతోనే హీరో ఉదయ్‌ కిరణ్‌ వెండితెరకు పరిచయమయ్యారు. ఇప్పుడీ హిట్‌ చిత్రానికి సీక్వెల్‌గా ‘చిత్రం 1.1’ని తీసుకొచ్చేందుకు సిద్ధమయ్యారు తేజ. సోమవారం ఆయన పుట్టినరోజు సందర్భంగా ఈ విషయాన్ని అధికారికంగా ప్రకటించారు. ఈ మేరకు టైటిల్‌ పోస్టర్‌ని విడుదల చేశారు. ఈ సందర్భంగా ఆయన మాట్లాడుతూ.. ‘‘తొలి భాగానికి తగ్గట్లుగానే మంచి యువతరం మెచ్చే ప్రేమకథతో స్క్రిప్ట్‌ సిద్ధం చేశాం. ఈ సినిమాతో 45మంది కొత్త నటీనటులను తెరకు పరిచయం చేయనున్నాం. త్వరలో ఆడిషన్స్‌ ప్రక్రియ ప్రారంభిస్తాం. తొలి ‘చిత్రం’కు బాణీలందించిన ఆర్పీ పట్నాయక్‌.. ఈ సీక్వెల్‌కీ స్వరాలందిస్తున్నారు. స్క్రిప్ట్‌ పనులు పూర్తయ్యాయి. త్వరలో చిత్రీకరణ ప్రారంభిస్తాం. 70శాతం వరకు చిత్రీకరణ రామోజీ ఫిల్మ్‌సిటీలో జరుగుతుంది. నిర్మాతలు ఎవరన్నది ఇంకా ఖరారు చేయలేదు. త్వరలో మర్ని వివరాలు ప్రకటిస్తాం’’ అన్నారు. ఈ చిత్రానికి కూర్పు: కోటగిరి వెంకటేశ్వరరావు, ఛాయాగ్రహణం: సమీర్‌ రెడ్డి.