close

ప్ర‌త్యేక క‌థ‌నం

మున్నాభాయ్‌ డిగ్రీ కాలేజ్‌లు

ప్రవేశాలే.. తరగతులు ఉండవు
బోధన రుసుముల పేరిట దోపిడీ
రూ.కోట్లు కొల్లగొడుతున్న కొన్ని ప్రైవేటు యాజమాన్యాలు
సిబ్బంది లేరంటూ చేతులెత్తేస్తున్న తనిఖీ వ్యవస్థలు
రాష్ట్రంలో గాడితప్పుతున్న ప్రైవేటు డిగ్రీ కళాశాలలు
‘ఈనాడు’ పరిశీలనలో వెలుగుచూసిన అవకతవకలు

గుంటూరు జిల్లా చెరుకుపల్లి మండలం అరుంబాకలోని ప్రైవేటు డిగ్రీ కళాశాల ఇది.  విద్యార్థులు లేక ఏడేళ్ల కిందటే దీన్ని మూసేశారని స్థానికులు చెబుతున్నారు. అధికారుల లెక్కల ప్రకారం మాత్రం ఇక్కడ ఇప్పటికీ డిగ్రీ కళాశాల నడుస్తోంది. ఏటా వందల మంది విద్యార్థులు చదివి, ఉత్తీర్ణులవుతున్నారు. వీరికి రాష్ట్ర ప్రభుత్వం తరపున బోధన రుసుములను సైతం చెల్లిస్తున్నారు. ఈ విద్యా సంవత్సరంలో బీఎస్సీ, బీకామ్‌లలో కలిపి 142 మంది చదువుతున్నట్లు నిర్వాహకులు లెక్కలు చూపడం గమనార్హం.

ఇది గుంటూరు జిల్లా కొల్లిపరలోని ఓ ప్రైవేట్‌ డిగ్రీ కళాశాల. కంప్యూటర్‌ ల్యాబ్‌ అని బయట బోర్డు ఉంది. లోపల ఒక్క కంప్యూటర్‌ ఉంటే ఒట్టు. ఈ భవనంలోనే బీఈడీ, టీటీసీ, డిగ్రీ కళాశాలలతోపాటు వ్యవసాయ పాలిటెక్నిక్‌ కళాశాల కూడా కొనసాగుతుండడం మరింత విచిత్రం. బీఈడీ, డిగ్రీ కళాశాలల్లో విద్యార్థులను చేర్చుకుంటున్న యాజమాన్యం తరగతులు నిర్వహించడం లేదని అక్కడ పని చేస్తున్నవారే చెప్పడం గమనార్హం. రికార్డుల ప్రకారం ఇక్కడ బీఏ, బీఎస్సీ, బీకాంల్లో దాదాపు 500 మంది విద్యార్థులు చదువుకుంటున్నారు.

మున్నాభాయ్‌ ఎంబీబీఎస్‌ సినిమాలో ఆసుపత్రి లేకున్నా ఉన్నట్లు నాటకమాడడం తెరమీద రక్తికట్టింది. రాష్ట్రంలోని కొన్ని ప్రైవేటు డిగ్రీ కళాశాల యాజమాన్యాలు అంతకంటే ఎక్కువగా జీవించేస్తున్నాయి. వందల మంది విద్యార్థులున్నట్లు రికార్డుల్లో చూపుతున్నా అందులో ఒక్కరంటే ఒక్క విద్యార్థీ ఉండని కళాశాలలు బోలెడు. ఒక్క కంప్యూటర్‌ కూడా లేకుండానే కంప్యూటర్‌ కోర్సులు నడిపే కాలేజ్‌లు, అధ్యాపకులు లేకున్నా నూరు శాతం ఉత్తీర్ణత చూపే కళాశాలలు తక్కువేమీ కాదు. తనిఖీలు, పర్యవేక్షణలు చేయాల్సిన అధికారులు పట్టించుకోవడం మానేయడంతో రాష్ట్రంలో ప్రైవేట్‌ డిగ్రీ కళాశాలల నిర్వాహకులు ఆడింది ఆట పాడింది పాటగా మారింది. గుంటూరు జిల్లాలోని కల్లూరులోనే డిగ్రీ కళాశాల రికార్డుల్లో కొనసాగుతున్నా నాలుగైదేళ్లుగా ఇక్కడ ఒక్క విద్యార్థీ చేరకపోవడం గమనార్హం. ఇలాగే రాష్ట్రవ్యాప్తంగా చాలా ప్రైవేటు డిగ్రీ కళాశాలలు కాగితాల్లోనే కొసాగుతున్నాయి. వీటిలో విద్యార్థులకు ప్రవేశాలు కల్పిస్తున్నట్లు చూపుతున్న నిర్వాహకులు బోధన రుసుముల పేరుతో ప్రజాధనాన్ని మింగేస్తున్నారు. కళాశాలల వివరాలను ఆన్‌లైన్‌లో నమోదు చేయాలని ఆదేశించిన ఉన్నత విద్యామండలి అక్కడ కళాశాల ఉందా? అనే విషయాన్ని విస్మరిస్తోంది.

ఒక్కోచోట ఒక్కో రకం..

* ప్రైవేటు కోచింగ్‌ కేంద్రాల్లోని విద్యార్థులను సైతం విద్యా సంస్థల్లో చదువుతున్నట్లు చూపుతున్నారు. కొన్ని యాజమాన్యాలు సీఏ కోచింగ్‌కు వచ్చే ఇంటర్‌ విద్యార్థులకు డిగ్రీ కళాశాలల్లో ప్రవేశాలు కల్పిస్తున్నాయి. వీరు తరగతులకు హాజరుకాకపోయినా వీరి పేరిట బోధన రుసుములు పొందడం, చివరిలో పరీక్షలు రాయించడం పరిపాటిగా మారింది.
* కొన్ని కళాశాలలు ప్రవేశాలు కల్పిస్తున్నాయి. కానీ తరగతులు నిర్వహించడం లేదు. రావాల్సిన అవసరం లేదని విద్యార్థులకే నేరుగా చెప్పేస్తున్నాయి. గుంటూరులోని కొల్లిపర కళాశాలకు వెళ్లిన ‘ఈనాడు’ ప్రతినిధులకు అక్కడ సిబ్బంది ఇదే మాట చెప్పడం కొసమెరుపు.
* బీఎస్సీ, బీకాం కంప్యూటర్స్‌ నిర్వహిస్తున్న కళాశాలల్లో కంప్యూటర్‌ ల్యాబ్‌లు ఉండడం లేదు. తూతూమంత్రంగా కోర్సులు పూర్తి చేయడంతో విద్యార్థుల్లో నైపుణ్యం కొరవడుతోంది.

రుసుములు ఇష్టారాజ్యం

డిగ్రీ కళాశాల రుసుములు ఒక్కో వర్సిటీలో ఒక్కోలా ఉంటున్నాయి. ఉన్నత విద్యలో ప్రభుత్వమే బోధన రుసుములు చెల్లిస్తున్నందున ఫీజుల పెంపును వర్సిటీలు గానీ, ఉన్నతాధికారులుగానీ పెద్దగా పట్టించుకోవడం లేదు. డిగ్రీలో దాదాపు 80% వరకు రుసుములను ప్రభుత్వమే చెల్లిస్తోంది. కళాశాలల్లోని సదుపాయాలు, మౌలిక వసతులతో సంబంధం లేకుండానే ఆయా వర్సిటీ పరిధిలోని అన్ని కళాశాలలు దాదాపు ఒకే విధంగా రుసుములు వసూలు చేస్తున్నాయి.
* బీఏ కోర్సుకు గతేడాది వరకు రాయలసీమ వర్సిటీ పరిధిలో రూ.7,200 రుసుము ఉండగా.. ప్రస్తుతం రూ.15,840కు పెంచారు. ఇతర కోర్సుల్లోనూ రూ.ఐదారు వేలు చొప్పున పెంచేశారు.
* బీఏకు శ్రీ వేంకటేశ్వర విశ్వవిద్యాలయ పరిధిలో రూ.16,080 ఉంది. బీబీఎం కోర్సుకు రాయలసీమ, శ్రీ వేంకటేశ్వర వర్సిటీల పరిధిలో రూ.19,270 రుసుములు ఉండగా.. యోగి వేమన, శ్రీకృష్ణదేవరాయ వర్సిటీల పరిధిలో రూ.23,040 వసూలు చేస్తున్నారు.

నేతలను నొప్పించొద్దని..

దాదాపు 40% ప్రైవేట్‌ కళాశాలలు రాజకీయ నాయకులు, వారి అనుచరుల ఆధీనంలోనే కొనసాగుతున్నాయి. అధ్యాపకులు లేకున్నా, అసలు తరగతులే నడవకపోయినా అధికారులు వీటిపై చర్యలు తీసుకోకపోవడానికి ఇదే ప్రధాన కారణం. నిబంధనల ప్రకారం అద్దె భవనాల్లో కొనసాగుతున్న కళాశాలలు పక్కా భవనాల్లోకి మారాలి. ఏళ్లకేళ్లుగా కళాశాలలు అద్దె భవనాల్లోనే కొనసాగుతున్నాయి. ఏటా వీటికి నోటీసులు జారీ చేయడం ఆ తర్వాత రాజకీయ ఒత్తిళ్లు, పైరవీలకు తలొగ్గి అనుమతులు ఇచ్చేయడం సర్వసాధారణంగా మారింది.

అనుమతి ఇక్కడ.. నిర్వహణ ఎక్కడో?

అనుమతి లేకపోయినా కళాశాలలను ఒక ప్రాంతం నుంచి మరోచోటకు ఇష్టారాజ్యంగా తరలించేస్తున్నారు. పురపాలక సంస్థల పరిధిలో డిగ్రీ కళాశాలను ఏర్పాటు చేస్తే మూలనిధి (కార్పస్‌ ఫండ్‌) కింద రూ.5 లక్షలు చెల్లించాలి. గ్రామీణ ప్రాంతాల్లో కళాశాలలను ప్రోత్సహించేందుకు ప్రభుత్వం మూలనిధి మినహాయింపునిచ్చింది. దీంతో కొందరు గ్రామీణం పేరుతో అనుమతి తీసుకొని పట్టణ సమీపాలకు మార్చేస్తున్నారు. అధికారుల లెక్కల ప్రకారమే గత ఎనిమిదేళ్లలో 58 కళాశాలలను ఒక ప్రాంతం నుంచి మరో ప్రాంతానికి మార్చేశారు.

పర్యవేక్షణ పట్టేది ఎవరికి?

ఉన్నత విద్యామండలి కొత్త ప్రైవేటు డిగ్రీ కళాశాలలకు అనుమతిస్తోంది. ఆ తర్వాత వర్సిటీలు అనుబంధ గుర్తింపునిస్తున్నాయి. కానీ తనిఖీలు మాత్రం చేయడం లేదు. అదేమంటే తమకు సిబ్బంది కొరత ఉందని సమాధానం వస్తోంది. కొత్త కళాశాలలకు అనుమతులు ఇవ్వాలంటే కమిటీ వేయడం, నివేదిక తెప్పించుకోవడం మినహా విద్యాబోధన ఎలా సాగుతుందో పట్టించుకోవడం లేదు. కళాశాల విద్యాశాఖ కమిషనరేట్‌ ప్రైవేటు వాటివైపు కన్నెత్తి చూడడం లేదు. సంక్షేమ శాఖలు కళాశాలల నుంచి వచ్చే వివరాలను క్షేత్రస్థాయిలో తనిఖీ చేయకుండానే బోధన రుసుములను చెల్లించేస్తున్నాయి. దీంతో కోట్ల రూపాయల ప్రజాధనం అక్రమార్కుల పాలవుతోంది.

ఇదీ లెక్క

రాష్ట్రంలో ప్రైవేటు డిగ్రీ కళాశాలలు:  1,152
25% ప్రవేశాలు నమోదైన కళాశాలలు:   464
2550% ప్రవేశాలు నమోదైనవి:    309
సొంత భవనాలున్నవి:   398
అద్దె భవనాల్లో కొనసాగుతున్నవి: 754
- ఈనాడు, అమరావతి

మరిన్ని

జిల్లా వార్తలు

దేవ‌తార్చ‌న

రుచులు
+

© 1999- 2019 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact : 9000180611, 040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.