కండలవీరుడిని ప్రశంసించిన సోనాక్షి సిన్హా

ముంబయి: బాలీవుడ్‌ కండల వీరుడు సల్మాన్‌ఖాన్‌పై నటి సోనాక్షి సిన్హా ప్రశంసలు కురిపించారు. ఇప్పటికే వీరిద్దరు ‘దబాంగ్‌’, ‘దబాంగ్‌ 2’ చిత్రాల్లో కలిసి నటించి ప్రేక్షకులను మెప్పించారు. ప్రస్తుతం వీరిద్దరి కాంబినేషన్‌లో వస్తోన్న హ్యాట్రిక్‌ చిత్రం ‘దబాంగ్ 3’. ప్రభుదేవా దర్శకత్వం వహించారు. క్రిస్మస్‌ కానుగా డిసెంబర్‌ 20న ఈ సినిమా ప్రేక్షకుల ముందుకు రానుంది. ఈ నేపథ్యంలో తాజాగా సోనాక్షి ఓ ఆంగ్ల ప్రతికతో ముచ్చటించారు. స్టార్‌డమ్ ఉన్నా సరే సల్మాన్‌ చాలా సాధారణమైన వ్యక్తిగా ఉంటాడని ఆమె అన్నారు. అంతేకాకుండా మంచి కెరీర్‌ కావాలంటే సల్మాన్‌లో ఉన్న కొన్ని లక్షణాలను ప్రతి ఒక్కరూ నేర్చుకోవాలని ఆమె సూచించారు. 

‘‘నేను సల్మాన్‌తో మొదటిసారి ‘దబాంగ్‌’ చిత్రం కోసం పనిచేశాను. అది 2010లో విడుదలైంది. తాజాగా ‘దబాంగ్‌ 3’ కోసం సల్మాన్‌తో పనిచేశాను. అప్పటికీ, ఇప్పటికీ సల్మాన్‌ ప్రవర్తనలో ఎలాంటి మార్పు లేదు. ఆయన నుంచి ఎన్నో విషయాలు నేర్చుకున్నాను. నా జీవితంలో వాటిని ఫాలో అవుతుంటాను. అన్నీంటికంటే ముఖ్యమైన విషయం ఏమిటంటే సల్మాన్‌.. తన స్టార్‌డమ్‌ను సిరియస్‌గా తీసుకోరు. స్టార్‌డమ్ ఉన్నా సరే ఆయన మాత్రం సాధారణమైన వ్యక్తిలాగానే ఉంటారు. ఎంతో ఖరీదైన హోటళ్లలో బస చేసే సల్మాన్‌ సాధారణ ఇంటిలో కూడా నివసించగలరు.’’

‘స్టార్‌డమ్‌ను కనుక సల్మాన్‌ తలకెక్కించుకున్నట్లైతే ఇంతంటి కెరీర్‌ను పొందేవారు కాదేమో. సినీరంగంలోకి వచ్చిన కొత్తలో ఎంత ఉత్సాహాంతో పనిచేశారో ఇప్పుడు అలాగే పనిచేస్తున్నారు. మీకు కూడా మంచి కెరీర్‌ ఉండాలనుకుంటే సల్మాన్‌ నుంచి అదే ఫాలో అవ్వండి. సల్మాన్‌.. తనతో తనే పోటీ పడతాడు. నిన్నటికంటే ఈరోజు మరింత బాగా నటించాలని అనుకుంటాడు.’

‘దబాంగ్‌ చిత్రంతో నేను చిత్రపరిశ్రమలోకి అడుగుపెట్టాను. ఇప్పటికి తొమ్మిదేళ్లు అయ్యాయి. ‘దబాంగ్‌3’ నా 25వ సినిమా. సినీ రంగంలోకి వచ్చినప్పటి నుంచి వృత్తిపరంగా ఎన్నో విషయాలను తెలుసుకుంటున్నాను. నా ప్రయాణం సంతోషంగా సాగుతోంది’ అని సోనాక్షి తెలిపారు.