కరెంట్‌ అఫైర్స్‌

మాదిరి ప్రశ్నలు

* అత్యల్ప దూరం ఎగిరే బల్లి జాతికి చెందిన చిన్న జీవిని భారత్‌లో తొలిసారిగా ఇటీవల మిజోరంలో శాస్త్రవేత్తలు గుర్తించారు. చెట్లపై జీవించే దీనికి ఏ పేరు పెట్టారు? (ఒక చెట్టు నుంచి మరో చెట్టుకు ఒక్క ఉదుటున దూకడం దీని ప్రత్యేకత. 20 సెం.మీ. పొడవుండే ఈ జీవికి గెంతేందుకు అనువుగా తోక చివరి భాగం పైకి వంగి ఉంటుంది. ఈ పరిశోధనలో జర్మనీలోని మ్యాక్స్‌ ప్లాంక్‌ ఇన్‌స్టిట్యూట్‌ ఆఫ్‌ బయాలజీ పరిశోధకులు కూడా పాలుపంచుకున్నారు.)  

జ: గెక్కో మిజోరమెన్సిస్‌

* ప్రపంచ వ్యవసాయ పర్యాటక దినోత్సవాన్ని ఏ రోజున నిర్వహిస్తారు? (సాగు కార్యకలాపాలను పర్యాటకంతో జతచేసి సందర్శకులకు ఉల్లాసాన్ని పంచే వ్యాపార నమూనాయే అగ్రి టూరిజం. దేశంలో మొదట మహారాష్ట్రలో ప్రారంభమైన అగ్రి టూరిజం ప్రస్తుతం వేగంగా విస్తరిస్తోంది. ప్రపంచవ్యాప్తంగా పర్యాటక రంగం ఏటా 4 శాతం వృద్ధిని నమోదు చేస్తున్నట్లు ప్రపంచ టూరిజం సంస్థ అంచనా వేసింది. భారత్‌లో మాత్రం ఇది 10.1 శాతం వృద్ధితో దూసుకుపోతోంది. ఓ అధ్యయనం ప్రకారం భారత్‌లో అగ్రి టూరిజం ఏటా 20 శాతం వృద్ధిని నమోదు చేస్తుంది.)

జ: మే 16

* ‘హోజైల్‌ హోమ్‌ ల్యాండ్స్‌ : ద న్యూ అలయెన్స్‌ బిట్విన్‌ ఇండియా అండ్‌ ఇజ్రాయెల్‌’ పుస్తకాన్ని ఇటీవల ఎవరు రూపొందించారు? (భారత్‌ - ఇజ్రాయెల్‌ మధ్య సంబంధాలను ఈ గ్రంథంలో అక్షర బద్ధం చేశారు.)

జ: ఆజాద్‌ ఎస్సా

* దేశీయంగా చదువుకునే సమయంలో సామాజికంగా, ఆర్థికంగా వెనుకబడిన వర్గాల విద్యార్థుల కష్టాలు తీర్చడానికి ఉన్నత విద్యాసంస్థల్లో ‘ఎర్న్‌ వైల్‌ లెర్న్‌ - చదువుతూ సంపాదన’ పథకాన్ని ప్రవేశపెట్టాలని ఏ సంస్థ ప్రతిపాదించింది? (ఈ మేరకు దేశంలోని అన్ని కేంద్రీయ, రాష్ట్ర విశ్వవిద్యాలయాలతో పాటు ఇతర విద్యా సంస్థలకు ఈ సంస్థ ఇటీవల సంబంధిత ముసాయిదాను పంపింది.)

జ: యూనివర్సిటీ గ్రాంట్స్‌ కమిషన్‌ (యూజీసీ)