UPSC: ఉచిత విద్య.. ఉన్నతోద్యోగం: యూపీఎస్సీ NDA పరీక్షకు నోటిఫికేషన్ వచ్చేసింది!

UPSC NDA, Naval Academy Exam: యూపీఎస్సీ ఎన్‌డీఏ, నేవల్‌ అకాడమీ కోర్సుల్లో ప్రవేశాలకు నోటిఫికేషన్‌ విడుదలైంది. ఈ కోర్సులకు ఎంపికై విజయవంతంగా పూర్తి చేస్తే ఉన్నతోద్యగాల్లో స్థిరపడేందుకు ఇదో మంచి ఛాన్స్‌.

Published : 17 May 2023 21:15 IST

దిల్లీ: దేశానికి సేవ చేయాలనే తపనతో పాటు ఉన్నతోద్యోగాల్లో స్థిరపడాలనుకునే యువతకు గుడ్‌న్యూస్‌. యూనియన్‌ పబ్లిక్‌ సర్వీస్‌ కమిషన్‌(UPSC) ఏటా రెండుసార్లు నిర్వహించే నేషనల్ డిఫెన్స్ అకాడమీ(II) అండ్ నేవల్ అకాడమీ (ఎన్‌డీఏ అండ్ ఎన్ఏ) పరీక్షకు నోటిఫికేషన్‌ విడుదలైంది. ఈ నోటిఫికేషన్‌ ద్వారా త్రివిధ దళాలలోని పలు విభాగాల్లో వచ్చే ఏడాది జులై 2 నుంచి ప్రారంభమయ్యే NDA 152వ కోర్సులో, 114వ ఇండియన్ నేవల్ అకాడమీ (INAC) కోర్సుల్లో ప్రవేశాలు పొందవచ్చు. కోర్సు విజయవంతంగా పూర్తి చేసిన వారికి ఉద్యోగావకాశాలు కల్పిస్తారు. ఇంటర్‌ ఉత్తీర్ణులైన అభ్యర్థులు జూన్‌ 6లోగా ఆన్‌లైన్‌లో దరఖాస్తు చేసుకోవాల్సి ఉంటుంది.

పూర్తి నోటిఫికేషన్‌ ఇదే..

నోటిఫికేషన్‌లో కొన్ని ముఖ్యాంశాలు..

మొత్తంగా 395 ఖాళీలు ఉండగా.. వీటిలో నేషనల్ డిఫెన్స్ అకాడమీ పోస్టులు 370 (ఆర్మీ-208, నేవీ-42, ఏయిర్‌ఫోర్స్- 120) కాగా.. 28 గ్రౌండ్ డ్యూటీకి సంబంధించిన ఖాళీలు. నేవల్ అకాడమీ (10+2 క్యాడెట్ ఎంట్రీ స్కీమ్) ఖాళీలు 25 ఉన్నాయి.
ఆర్మీ వింగ్ పోస్టులకు దరఖాస్తు చేసుకునే వారు ఏదైనా గ్రూపులో ఇంటర్ ఉత్తీర్ణులై ఉండాలి. ఎయిర్ ఫోర్స్, నేవీ పోస్టులకు 10+2 క్యాడెట్ ఎంట్రీ స్కీమ్ (ఇండియన్ నేవల్ అకాడమీ) ద్వారా దరఖాస్తు చేయాలనుకుంటే ఫిజిక్స్, మ్యాథ్స్ సబ్జెక్టులతో ఇంటర్ లేదా తత్సమాన కోర్సులో పాసై ఉండాలి. దీంతోపాటు నిర్దిష్ట శారీరక ప్రమాణాలు ఉండాలి. ప్రస్తుతం ద్వితీయ సంవత్సరం చదువుతున్నవారూ అర్హులే.
మే 17 నుంచి జూన్‌ 6న సాయంత్రం 6గంటల వరకు ఆన్‌లైన్‌లో దరఖాస్తులు చేసుకోవచ్చు. అయితే, అవివాహిత పురుష, మహిళా అభ్యర్థులు 02-01-2005కి ముందు, 01-01-2008 తేదీకి తర్వాత జన్మించి ఉండరాదని నిబంధన విధించారు. దరఖాస్తు రుసుం రూ.100 (ఎస్సీ, ఎస్టీ, మహిళా అభ్యర్థులకు మినహాయింపు)
దరఖాస్తులను సవరించుకొనేందుకు జూన్‌ 7 నుంచి 13వరకు అవకాశం కల్పిస్తారు.
సెప్టెంబర్‌ 3న ఆన్‌లైన్‌ రాత పరీక్ష ఉంటుంది. తెలుగు రాష్ట్రాల్లో హైదరాబాద్‌, వరంగల్‌, విశాఖపట్నం, విజయవాడ, తిరుపతి, అనంతపురం.
ఎంపిక విధానం: అభ్యర్థుల ఎంపిక రెండు దశల్లో జరుగుతుంది. రాత పరీక్ష, ఇంటెలిజెన్స్- పర్సనాలిటీ టెస్ట్, ఎస్‌ఎస్‌బీ టెస్ట్‌/ ఇంటర్వ్యూ, మెడికల్‌ టెస్టు తదితరాల ఆధారంగా ఎంపిక ప్రక్రియ నిర్వహిస్తారు.
కోర్సులు: నేషనల్ డిఫెన్స్ అకాడమీ అండ్ నేవల్ అకాడమీ (ఎన్‌డీఏ అండ్ ఎన్ఏ), ఆర్మీ 10+2 టెక్నికల్ ఎంట్రీ, నేవీ 10+2 బీటెక్ క్యాడెట్ ఎంట్రీ పరీక్షలో మెరిట్ సాధిస్తే డిగ్రీ కోర్సులకు ఎంపిక‌వుతారు. అలా ఎంపికైన‌వారు బీఏ, బీఎస్సీ, బీటెక్ కోర్సుల్లో తాము ఎంచుకున్న దాన్ని ఉచితంగా చ‌ద‌వవ‌చ్చు.
శిక్షణ: తుది అర్హత సాధించిన అభ్యర్థులు నేష‌న‌ల్ డిఫెన్స్ అకాడ‌మీ, పుణెలో చ‌దువు, శిక్షణ పొందుతారు. అనంత‌రం ఆర్మీ క్యాడెట్ల‌ను దేహ్రాదూన్‌లోని ఇండియ‌న్ మిల‌ట‌రీ అకాడ‌మీకి; నేవ‌ల్‌ ‌క్యాడెట్ల‌ను ఎలిమ‌ల‌లోని ఇండియ‌న్ నేవ‌ల్ అకాడ‌మీకి; ఎయిర్ ఫోర్స్ క్యాడెట్‌లు హైద‌రాబాద్‌లోని ఇండియ‌న్ ఎయిర్ ఫోర్స్ అకాడ‌మీకి సంబంధిత ట్రేడ్ శిక్షణ కోసం పంపిస్తారు.
అభ్యర్థి ఎంపికైన విభాగాన్ని బ‌ట్టి ఈ శిక్షణ ఏడాది నుంచి ఏడాదిన్నర వ‌ర‌కు ఉంటుంది. కోర్సు విజ‌య‌వంతంగా పూర్తి చేసుకున్న అభ్యర్థులను ఉద్యోగాల్లోకి తీసుకుంటారు. ఆర్మీ, నేవీ, ఎయిర్ ఫోర్స్‌లలో ప్రారంభ స్థాయి ఆఫీసర్ ఉద్యోగాలైన లెఫ్టినెంట్, సబ్-లెఫ్టినెంట్, ఫ్లయింగ్ ఆఫీసర్/గ్రౌండ్ డ్యూటీ ఆఫీసర్ హోదాతో కెరియర్ ప్రారంభం అవుతుంది.

దరఖాస్తుల కోసం క్లిక్‌ చేయండి

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.