కాలి సిరలు ఉబ్బితే?

కాలి సిరలు ఉబ్బితే (వెరికోజ్‌ వీన్స్‌) వాటిని తొలగించు కోవటం ఒక్కటే పరిష్కారం. స్క్లీరోథెరపీ, లేజర్‌ థెరపీ, అలాగే సర్జరీతో సిరలను మూసేయటం లేదా తీసేయటం వంటి చికిత్సలు అందుబాటులో ఉన్నాయి. అయితే అదృష్టం కొద్దీ చాలామందికి ఇలాంటి చికిత్సల అవసరం ఉండదు. బిగుతు సాక్స్‌ ధరించటం వంటి చిట్కాలతోనూ మంచి ఫలితం కనిపిస్తుంది. ఈ సాక్స్‌ సిరలు ఉబ్బకుండా అదిమి పడతాయి. వీటిని రోజంతా ధరిస్తే నొప్పి, పొడుస్తున్నట్టు అనిపించటం, చిరచిర వంటి ఇబ్బందులు తగ్గుతాయి. ఒకప్పుడు వీటిని ధరించటం నామోషీగా భావించేవారు. ఇప్పుడు రకరకాల రంగుల్లో లభిస్తుండటంతో ఎంతోమంది ధరిస్తున్నారు. ఆకర్షణీయంగానూ కనిపిస్తున్నాయి.

• పీచు, పొటాషియం, ఫ్లేవనాయిడ్లతో కూడిన ఆహారం తినటమూ మేలు చేస్తుంది. కూరగాయలు, పండ్లకు రంగును తెచ్చిపెట్టే ఫ్లేవనాయిడ్లు రక్తపోటు తగ్గటానికి తోడ్పడతాయి. ఇలా పరోక్షంగా సిరల ఉబ్బు తగ్గటానికీ దోహదం చేస్తాయి.
• కూర్చున్నప్పుడు, పడుకున్నప్పుడు కాళ్లు ఎత్తుగా ఉండేలా చూసుకోవటం మంచిది. గోడకు కాస్త దగ్గరగా వెల్లకిలా పడుకొని, కాళ్లను గోడకు ఆనించి పైకి లేపి, కాసేపు అలాగే ఉన్నా మేలే. గుండె కన్నా కాళ్లు ఎత్తుగా ఉన్నప్పుడు గురుత్వాకర్షణ ప్రభావంతో సిరలు రక్తాన్ని పైకి నెట్టటానికి వీలవుతుంది.