రుచికరమైన ఎగ్‌ మంచూరియా

మా అబ్బాయికి ఎగ్‌ మంచూరియా చాలా ఇష్టం. కానీ నాకు అంతగా కుదరడం లేదు. మరింత టేస్టీగా చేయడానికి కొన్ని టిప్స్‌ చెప్పండి!

• ఎగ్‌ మంచూరియా కోసం కొన్ని గుడ్లను 10 నుంచి 12 నిమిషాలు ఉడికించి, పొడవుగా, నాలుగు చీలికలుగా కట్‌ చేయాలి.
• ఇంకొన్ని గుడ్లు పగలకొట్టి.. సొనలో ఉప్పు, మిరియాల పొడి వేసి కలపాలి. అందులో మైదా, కార్న్‌ ఫ్లోర్‌ వేసి మళ్లీ కలపాలి. ఈ మిశ్రమంలో కట్‌ చేసిన గుడ్లను ముంచి, కాగిన నూనెలో నెమ్మదిగా వేయాలి. గరిట పెట్టకుండా ఒక నిమిషం వదిలేసి తర్వాత లేత బంగారు రంగు వచ్చేదాకా వేయించాలి. 
• కడాయిలో కాస్త నూనె వేసి.. అల్లం, వెల్లులి తరుగు, ఉల్లి, పచ్చిమిర్చి ముక్కలు వేసి వేయించాలి. గోధుమ రంగులోకి మారాక.. మిర్చి, టొమాటో, సోయా సాస్, కారం, ఉప్పు వేసి హై ఫ్లేమ్‌ మీద ఎగరేసినట్లు చేయాలి. అందులో కొన్ని నీళ్లు పోసి ఉడికించాలి. కొంచెం చిక్కబడింది అనుకున్నాక.. వేయించిన గుడ్లు వేసి.. కలియ తిప్పాలి. 
• చివర్లో ఉల్లి కాడల తరుగు వేసి.. దింపేయాలి. ఎగ్‌ మంచూరియా వేడిగా ఉన్నప్పుడే తింటే చాలా రుచిగా ఉంటుంది.

పవన్‌ సిరిగిరి, చెఫ్, హైదరాబాద్‌