కరకరలాడే బిస్కెట్‌ భాకరీ

గుజరాతీల ప్రియమైన వంటకం బిస్కెట్‌ భాకరీ. ఇవెంత చూడముచ్చటగా ఉంటాయో అంత టేస్టీగా ఉంటాయి. వీటినెలా చేయాలంటే.. ఒక పాత్రలో కప్పున్నర గోధుమ పిండి, పావు కప్పు వేడి నూనె, పావు కప్పు నీళ్లు, రుచికి సరిపోయేంత ఉప్పు వేసి.. బాగా కలపాలి. మెత్తటి పిండి తయారయ్యాక.. ఓ పావుగంట పక్కనుంచాలి. నిమ్మకాయంత చొప్పున పిండిని తీసుకుని.. కాస్త మందమైన రొట్టె చేసి.. కటోరా గిన్నెతో నొక్కితే.. గుండ్రంగా వస్తుంది. తక్కిన పిండితోనూ ఇలాగే చేయాలి. అన్నీ తయారయ్యాక.. పెనం మీద నేతితో రెండు వైపులా కాల్చుకోవాలి. ఒక్కో దఫా మూడు లేదా నాలుగు చొప్పున పడతాయి. మధ్యలో పప్పుగుత్తితో ప్రెస్‌ చేస్తే.. చక్కటి బిస్కెట్‌ ఆకృతిలోకి వస్తాయి. ఈ బిస్కట్‌ భాకరీలు ఒకసారి చేశారంటే.. పిల్లలు మళ్లీ మళ్లీ కావాలంటారు. అంత రుచిగా ఉంటాయి మరి.