మనింట్లో తమిళుల వంట!

సాంబార్‌ నుంచి పిండి వంటల వరకూ తమిళనాడు వాళ్లవి మహా రుచిగా ఉంటాయి కదూ! అందులోనూ ‘చెట్టినాడ్‌’ పేరు వింటే చాలు.. నోట్లో నీరూరుతుంది. మరి.. మన వంటలూ అలా ఉండాలంటే- చెట్టినాడ్‌ మసాలా పౌడర్‌ ఉంటే సరిపోతుంది. ఆ ఆ పౌడర్‌ను కూర, ఇగురు, బిర్యానీ.. ఎందులో వేసినా.. అదనపు రుచి వచ్చేస్తుంది. ఇంతకీ ఈ మసాలా ఎలా చేయాలంటే.. నాలుగు చెంచాలు ధనియాలు, 3 చెంచాలు సోంపు, ఆవాలు, గసగసాలు చెంచా చొప్పున, 2 చెంచాలు జీలకర్ర, అర చెంచా వాము, పావు చెంచా మెంతులు, 10 మిరియాలు, 3 యాలకులు, 4 లవంగాలు, 2 నల్ల యాలకులు, దాల్చినచెక్క అంగుళం ముక్క, స్టార్‌ మొగ్గ ఒకటి, 15 కశ్మీరీ ఎండు మిరపకాయలు, అర చెంచా బిర్యానీ పువ్వు, కొద్దిగా జాపత్రి, కరివేపాకు 4 రెబ్బలు తీసుకోవాలి. ఈ దినుసులన్నిటినీ కడాయిలో వేసి సన్న సెగ మీద మంచి వాసన వచ్చే దాకా వేయించాలి. ఇందుకు సుమారుగా పది నిమిషాలు పడుతుంది. వేగిన వాటిని పూర్తిగా చల్లారనిచ్చి మిక్సీ జార్‌లోకి తీసి.. మెత్తగా గ్రైండ్‌ చేయాలి. ఈ పొడిని తడి లేని, గాలి చొరబడని సీసాలో భద్రం చేసుకుంటే రెండు నెలల వరకూ వాడుకోవచ్చు.