నానబెట్టడం మర్చిపోయారా?

కొంతమంది వంట చేస్తే అద్భుతంగా ఉంటుంది. మరికొంతమంది ఎన్ని జాగ్రత్తలు తీసుకుని వంట చేసినా రుచీపచీ ఉండదు. దానికి కారణం చిన్నచిన్న చిట్కాలు తెలియకపోవడమే అంటారు ప్రముఖ చెఫ్‌ సంజీవ్‌కపూర్‌..

* కూరలోకి సెనగపప్పుని నానబెట్టడం మర్చిపోయారా. ఇప్పుడెలా? మరేం ఫర్వాలేదు. వేడినీళ్లలో గంటన్నరపాటు నానబెట్టండి. రుచికరమైన కూరలు వండుకోవచ్చు.

* కొబ్బరిపాలని తీసిన తర్వాత ఫ్రిజ్‌లో ఉంచుతున్నారా? దానిపై వచ్చిన నీళ్లలాంటి తేటని పారేయొద్దు. ఆ నీరుని కూరల్లో నూనెకు బదులుగా వాడుకోవచ్చు. కూరలు చాలా రుచిగా ఉంటాయి.

* బంగాళాదుంపల్ని ఉడికిస్తున్నారా?ఆ నీటిలో చెంచా వెనిగర్‌ వేయండి. త్వరగా ఉడికిపోతాయి. ఆకృతి చెడిపోకుండా చూడచక్కగా ఉంటాయి.

* క్యాబేజీకానీ, క్యాలిఫ్లవర్‌ కానీ ఉడికిస్తుంటే ఆ నీటిలో కొద్దిగా పాలపొడి వేయండి. రంగు మారకుండా ఉడుకుతాయి. రుచీ బాగుంటుంది