సేల్‌ రోటీ.. సులభంగా చేసేద్దాం!

పొరుగు రుచి

స్వీట్లు ఇష్టపడని వాళ్లుండరు కదూ! మనం తరచూ తినే లడ్డూ, బర్ఫీ లాంటివి ఎంత బాగున్నా.. కొన్నిసార్లు కొత్త రుచులు కావాలనిపిస్తుంది. అలాంటప్పుడు ‘సేల్‌ రోటీ’ చేసి చూడండి.. ఇది సిక్కిం రాష్ట్రంలో ప్రసిద్ధం. ఈ రోటీ చేసేందుకు రెండు కిలోల బియ్యం, పావుకిలో పంచదార, కప్పు నెయ్యి, వేయించేందుకు సరిపడా నూనె, అర చెంచా చొప్పున దాల్చినచెక్క, యాలకుల పొడి, ఒక స్పూన్‌ బేకింగ్‌ పౌడర్‌ అవసరమవుతాయి.

ఎలా చేయాలంటే.. బియ్యం కడిగి ముందు రోజు రాత్రి నానబెట్టాలి. మర్నాడు ఉదయం నీళ్లు వంపేసి.. పంచదార, దాల్చినచెక్క, యాలకుల పొడి వేసి గ్రైండ్‌ చేయాలి. అందులో నెయ్యి, బేకింగ్‌ పౌడర్‌ కూడా వేసి బాగా కలపాలి. చిక్కటి ఈ మిశ్రమాన్ని గరాటును పోలిన పరికరంలో వేసి కాగుతున్న నూనెలో గుండ్రంగా తిప్పితే.. పెద్ద చేగోడీలా వస్తుంది. దీన్ని బంగారు రంగులోకి మారాక తీయాలి. తక్కిన పిండితోనూ ఇలాగే చేయాలి. అంతే ‘సేల్‌ రోటీ’ రెడీ. నోరూరించే ఈ తేలికైన స్వీటును మనమూ చేద్దామా!