ఓట్స్‌ వడలు తింటారా..

మా అబ్బాయికి ఓట్స్‌తో చేసే మసాలా వడలు చాలా ఇష్టం. నేను చేస్తే మెత్తగా వచ్చాయి. కరకరలాడుతూ మరింత రుచిగా ఉండేందుకు కొన్ని చిట్కాలు చెప్పండి!

• మన తెలుగు వారి ఇళ్లల్లో తరచూ చేసే మసాలా వడల్లా ఉత్తరాదివాళ్లు ఓట్స్‌ మసాలా వడ చేస్తారు. ఇవి తక్కువ నూనె పీలుస్తాయి కనుక ఆరోగ్యానికి మంచిది.
• శనగపప్పును ఎక్కువగా నానబెట్టకూడదు. రెండు గంటలు నానితే 80% నాని, మిగిలింది పలుకుగా ఉంటుంది. అలా ఉంటేనే వడలు కరకరలాడతాయి.
• పప్పును బరకగా రుబ్బి.. అందులో ఓట్స్‌, ఉల్లిపాయ ముక్కలు, పచ్చిమిర్చి తరుగు, కారం, తగినంత ఉప్పు వేసి బాగా కలపాలి.
• ఎక్కువ నీళ్లు పోయకుండా.. అవసరం మేరకు చెంచాతో కొద్ది కొద్దిగా పోస్తూ.. పిండిని గట్టిగా కలపాలి. వడలు సరిగా రాకుండా.. పొడిపొడిగా అయిపోతుంటే ఇంకొన్ని నీళ్లు పోయండి.
• ముందు హైఫ్లేమ్‌ మీద నూనెను కాగనివ్వాలి. సలసలా కాగిన తర్వాత.. వడలు వేసి మంటను కాస్త తగ్గించి.. ఎర్రగా వేయించాలి. ఇలా చేస్తే బయట కరకరలాడుతూ.. లోపల చక్కగా ఉడికి.. ఎంతో రుచిగా ఉంటాయి.