అతి పెద్ద మిఠాయి

దేశవిదేశాల్లో రకరకాల స్వీట్ల గురించి వింటుంటాం. అందుబాటులో ఉన్నవాటిని ఆరగించి ఆనందిస్తుంటాం. పంచదార, కోడిగుడ్లు, గెలాటిన్‌ అనే ప్రొటీన్‌లతో తయారయ్యే మెక్సికన్‌ మార్ష్‌మల్లౌ స్వీటును రుచి చూసిన వాళ్లంతా దాని గురించి గొప్పగా వర్ణిస్తుంటారు. అది క్యాండీ తరహాలో నములుతున్న కొద్దీ బబుల్‌గమ్‌లా సాగుతూ తమాషా రుచితో వహ్వా అనిపిస్తుందట. ఇప్పుడు దీని ప్రస్తావన ఎందుకంటే ‘డల్సెస్‌ మజాపన్‌ డి లా రోసా’ అనే మిఠాయిల సంస్థ 648.4 కిలోల బరువైన అతి పెద్ద మార్ష్‌మల్లౌ స్వీటు తయారుచేసి గతంలో ఉన్న 480 కిలోల రికార్డును అధిగమించింది. మెక్సికోలోని జలిస్కో రాష్ట్ర 200 వార్షికోత్సవ వేడుకల సందర్భంగా 100 మంది పాకశాస్త్ర ప్రవీణులు 53 గంటల పాటు శ్రమించి దీన్ని తయారుచేశారు. గిన్నిస్‌ వరల్డ్‌ రికార్డ్స్‌ న్యాయనిర్ణేత కార్లోస్‌ టాపియా రికార్డును ధృవీకరించిన తర్వాత మార్ష్‌మల్లౌ మిఠాయిని- ఆ వేడుక చూసేందుకు వచ్చిన వారందరికీ పంచిపెట్టారు.