అనర్సా అద్భుతః

ఝార్ఖండ్‌ రాష్ట్ర ప్రత్యేక మిఠాయి అనర్సా. ఇది చేయడానికి ఏమేం కావాలంటే.. బియ్యం కప్పున్నర, గోధుమపిండి అర కప్పు, బెల్లంపొడి కప్పు, పావు కప్పు పాలు, 3 చెంచాల వెన్న, చెంచా గసగసాలు, పావు కప్పు నువ్వులు, పావు చెంచా యాలకుల పొడి, వేయించడానికి సరిపడా నూనె అవసరమవుతాయి. తయారీ చాలా సులువే.. నువ్వులు, గసగసాలను కలిపి ఒక పళ్లెంలో పోయాలి. బియ్యం ముందు రోజు రాత్రి నానబెట్టి, ఉదయం ఆ నీళ్లు తీసేసి.. గ్రైండ్‌ చేయాలి. ఆ బియ్యప్పిండిని ఒక పాత్రలోకి తీసుకుని.. గోధుమపిండి, నెయ్యి, యాలకుల పొడి, బెల్లంపొడి, పాలు, వెన్న జతచేసి బాగా కలపాలి. ఈ పిండిని నిమ్మకాయంత భాగాలుగా తీసుకుని, అరచేతులతో బూరెల్లా చేసి.. నువ్వులు, గసగసాల్లో ముంచి తీసి.. కాగుతున్న నూనెలో వేయించాలి. బంగారు రంగులోకి మారగానే టిష్యూ పేపర్‌ మీదికి తీస్తే సరి.. ఘుమఘుమలాడే అనర్సా రెడీ. ఈ తియ్యటి స్వీటు ఎంతో శక్తి కూడా.

సాల్ట్‌ బిస్కెట్లకు చాలా రంధ్రాలు ఉంటాయి కదా! ఇవి ఎందుకని ఎప్పుడైనా ఆలోచించారా? అసలు విషయమేమంటే.. అలా చిల్లులు ఉంటే బిస్కెట్లను బేక్‌ చేసేటప్పుడు పగుళ్లు రావు. ముఖ్యంగా గాలి బుడగలు ఏర్పడవు.