Tirumala: నేటి నుంచి శ్రీవారి మెట్టుమార్గంలో భక్తులకు అనుమతి

ఈనాడు, తిరుపతి, న్యూస్‌టుడే, చంద్రగిరి: తిరుమలకొండకు నడిచి వెళ్లేందుకు అనుగుణంగా శ్రీవారిమెట్టు మార్గంలో గురువారం నుంచి భక్తులను అనుమతించనున్నారు. ఉదయం 8.30 గంటలకు తితిదే ఛైర్మన్‌ వైవీ సుబ్బారెడ్డి, ఉన్నతాధికారులతో కలిసి ప్రత్యేకపూజలు నిర్వహించిన అనంతరం భక్తులు ఆ మార్గంలో నడిచివెళ్లేందుకు అవకాశం కల్పిస్తారు. గతేడాది నవంబరులో కురిసిన భారీ వర్షాలకు వరదలు రావడంతో మెట్టుమార్గం అక్కడక్కడ ధ్వంసమైంది. పునరుద్ధరణ పనులకు తితిదే రూ.3.60 కోట్లు మంజూరు చేసింది. 5 నెలలుగా కార్మికులు శ్రమించి పనులు పూర్తి చేశారు. 800, 1,200వ మెట్ల వద్ద వంతెనలు కూలిపోవడంతో అక్కడ నిర్మాణ పనులు పటిష్ఠంగా చేపట్టారు.