ముక్కులో దూరిన రొయ్య

ఎండోస్కోపీతో తొలగించిన వైద్యుడు

భీమవరం పట్టణం, న్యూస్‌టుడే: చెరువులో పట్టుబడి చేస్తున్న సమయంలో ఓ వ్యక్తి ముక్కు రంధ్రంలోకి రొయ్య దూరి ఇరుక్కుపోయింది. ఈ ఘటన ఏలూరు జిల్లా గణపవరం మండలంలో బుధవారం జరిగింది. ముక్కు నుంచి అది ఎంతసేపటికీ బయటకు రాకపోవడంతో బాధితుడు ఉక్కిరిబిక్కిరయ్యారు. అతడిని భీమవరంలోని ఓ ప్రైవేటు ఆసుపత్రికి తరలించారు. వైద్యుడు ఎం.రామకృష్ణ పరీక్షించి ముక్కు రంధ్రాల్లో రొయ్య ముళ్లు లోపలికి గుచ్చుకున్నట్లు గుర్తించారు. ఎండోస్కోపీ చికిత్సతో ఆ రొయ్యను బయటకు తీశారు. వైద్యుడు చాకచక్యంగా రొయ్యను బయటకు తీశారని, అప్పటికి అది బతికే ఉండటం విశేషమని వైద్య సిబ్బంది వివరించారు.