కేజీబీవీల్లో ఒప్పంద ఉపాధ్యాయులకు ఊరట

ఈనాడు, అమరావతి: కస్తూర్బా గాంధీ బాలికా విద్యాలయాల్లో (కేజీబీవీ) పనిచేస్తున్న ఒప్పంద ఉపాధ్యాయులకు హైకోర్టులో ఊరట లభించింది. వారికి కనీస వేతన స్కేలును అమలు చేయాలని, 2022లో సవరించిన పే స్కేలు ప్రకారం పిటిషనర్లకు ఆరు వారాల్లో బకాయిలు చెల్లించాలని ప్రభుత్వాన్ని ఆదేశించింది. ‘ఒకే విధమైన విధులు నిర్వర్తిస్తున్న వారికి వేర్వేరుగా జీతభత్యాలు అందించడం సరికాదు. అలా చేయడమంటే బానిసత్వాన్ని, దోపిడీని ప్రోత్సహించడమే’నని వ్యాఖ్యానించింది. తమకు కనీస వేతనం అమలుచేసేలా ఆదేశాలివ్వాలని, బదిలీలను నిలువరించాలని కోరుతూ కేజీబీవీల్లోని రెసిడెన్షియల్‌ ఒప్పంద ఉపాధ్యాయులు పలువురు హైకోర్టులో వ్యాజ్యాలు వేశారు.