మాజీ మంత్రి యర్రా నారాయణస్వామి కన్నుమూత

ఉండి, న్యూస్‌టుడే: రాజ్యసభ మాజీ సభ్యుడు, రాష్ట్ర మాజీ మంత్రి యర్రా నారాయణస్వామి (92) బుధవారం సాయంత్రం భీమవరంలోని ప్రైవేటు ఆసుపత్రిలో కన్నుమూశారు. ఇటీవల అస్వస్థతకు గురైన ఆయన్ను కుటుంబ సభ్యులు ఆసుపత్రిలో చేర్పించారు. పశ్చిమగోదావరి జిల్లా ఉండి మండలం ఉప్పులూరు గ్రామానికి చెందిన నారాయణస్వామి 1931లో ఏప్రిల్‌ 30న జన్మించారు. ఎంఏ, ఎల్‌ఎల్‌బీ పూర్తి చేసిన ఆయన 1959లో ఉప్పులూరు సర్పంచిగా రాజకీయ అరంగేట్రం చేశారు. 1972-98 మధ్య ఎమ్మెల్సీగా, 1976-78 మధ్య కాంగ్రెస్‌ ప్రభుత్వ హయాంలో రాష్ట్ర లఘు పరిశ్రమలశాఖ మంత్రిగా వ్యవహరించారు. 1984లో తెదేపాలో చేరి ఆ పార్టీ తరఫున రెండు సార్లు తాడేపల్లిగూడెం శాసనసభ్యుడిగా, రాజ్యసభ సభ్యుడిగా ఎన్నికయ్యారు. తెదేపా ఉమ్మడి జిల్లా అధ్యక్షుడిగా, రాష్ట్ర ప్రధాన కార్యదర్శిగా, పొలిట్‌బ్యూరో సభ్యుడిగానూ పనిచేశారు. పోలవరం ప్రాజెక్టు సాధన కమిటీ ఛైర్మన్‌గా సేవలందించారు. దశాబ్దకాలంగా రాజకీయాలకు దూరంగా ఉంటున్నారు. గురువారం ఉప్పులూరులో అంత్యక్రియలు నిర్వహించనున్నారు.

చంద్రబాబు దిగ్భ్రాంతి

తెదేపా సీనియర్‌ నాయకుడు యర్రా నారాయణస్వామి మృతిపై పార్టీ అధినేత చంద్రబాబు దిగ్భ్రాంతి వ్యక్తం చేశారు. ఆయన కుటుంబ సభ్యులకు, ప్రగాఢ సానుభూతి తెలియజేశారు.