రాజధానిలో సెంటు భూమి స్థలాలు మాకొద్దు

మంగళగిరి గండాలయపేట వాసుల ధర్నా

మంగళగిరి, న్యూస్‌టుడే: రాజధానిలో సెంటు భూమి స్థలాలొద్దని, తాము ఉన్న చోటే నివాసాలకు పట్టాలివ్వాలని మంగళగిరి గండాలయపేట వాసులు స్థానిక మండల రెవెన్యూ కార్యాలయం ఎదుట శనివారం ధర్నా చేశారు. బలవంతంగా ఖాళీ చేయిస్తే ఉద్యమం చేపడతామని హెచ్చరించారు. నాలుగు దశాబ్దాల క్రితమే గండాలయపేటలో ఇళ్లు నిర్మించుకున్నామని, వాటికే పట్టాలివ్వాలని డిమాండ్‌ చేశారు. ఊరికి దూరంగా పట్టాలిస్తే ఇళ్లు కట్టుకొనే స్తోమత తమకు లేదని, నిత్యం పనుల కోసం నగరానికి రావడానికి దారి ఖర్చులు భారంగా మారతాయని వాపోయారు. సీపీఎం జిల్లా కార్యదర్శి వర్గ సభ్యుడు ఎస్‌.ఎస్‌.చంగయ్య, తెదేపా నాయకులు వాకా మాధవరావు పాల్గొన్నారు.