భూమి పోయిందని అలిగి నవ వధువు పుట్టింటికి.. అవమాన భారంతో భర్త ఆత్మహత్య

పారాణి ఆరకముందే పెళ్లింట విషాదం

దామెర, న్యూస్‌టుడే: జాతీయ రహదారి కోసం జరిపిన భూసేకరణ నవ దంపతుల మధ్య చిచ్చు పెట్టింది. ఎకరం భూమి పోయిందని తెలిసి నవ వధువు అలిగి పుట్టింటికి వెళ్లిపోగా అవమాన భారంతో భర్త ఆత్మహత్య చేసుకున్నాడు. హనుమకొండ జిల్లా దామెర మండలం పసరగొండ గ్రామంలో ఈ విషాదం చోటుచేసుకుంది. దామెర ఏస్సై హరిప్రియ తెలిపిన వివరాల ప్రకారం.. ఈ గ్రామానికి చెందిన నల్లెల గౌరయ్య (35) అనే యువరైతుకు వారం కిందట భూపాలపల్లి జిల్లాకు చెందిన ఓ యువతితో పెళ్లయింది. గౌరయ్యకు గ్రామంలో మూడెకరాల భూమి ఉంది. నాగ్‌పూర్‌-విజయవాడ ఎక్స్‌ప్రెస్‌ హైవే నిర్మాణం కోసం జరిపిన భూసేకరణలో ఎకరం భూమి పోయింది. ఈ విషయం పెళ్లికి ముందు చెప్పలేదని మనస్తాపం చెందిన గౌరయ్య భార్య మూడురోజుల కిందట పుట్టింటికి వెళ్లిపోయింది. పెళ్లయి వారం కాకముందే ఇలా జరగటంతో మనస్తాపం చెందిన గౌరయ్య సోమవారం పొలంలో చెట్టుకు ఉరేసుకొని మృతిచెందాడు. దీంతో వారం రోజుల్లోనే పెళ్లింట విషాదం చోటుచేసుకుంది.