మేజిస్ట్రేట్‌పై హత్యాయత్నం

బ్రహ్మపుర నగరం, న్యూస్‌టుడే: విధుల్లో ఉన్న ఎస్‌డీజేఎం(సబ్‌ డివిజనల్‌ జ్యుడిషియల్‌ మేజిస్ట్రేట్‌)పై హత్యాయత్నం ఘటన ఒడిశాలోని గంజాం జిల్లా కోర్టులో కలకలం రేపింది. పోలీసులు తెలిపిన ప్రకారం... బ్రహ్మపుర ఎస్‌డీజేఎం ప్రజ్ఞా పరమిత ప్రతిహారి సోమవారం మధ్యాహ్నం 2.30 గంటల సమయంలో కోర్టులో విధులు నిర్వర్తిస్తున్నారు. అదే సమయంలో పాత బ్రహ్మపుర జమాదేవి వీధికి చెందిన భగవాన్‌ సాహు(51) న్యాయస్థానం లోపలకు వచ్చాడు. కాసేపు నిల్చున్న తర్వాత ఒక్కసారిగా ఎస్‌డీజేఎం వద్దకు దూసుకెళ్లి, ఆమె మెడపై చాకు ఉంచి చంపేస్తానని బెదిరించాడు. అప్రమత్తమైన ఓ న్యాయవాది, ఇతరులు అతడిని బంధించి, చాకు స్వాధీనం చేసుకున్నారు. పోలీసులు నిందితుడిని అదుపులోకి తీసుకుని బి.ఎన్‌.పూర్‌ పోలీస్‌స్టేషన్‌కు తరలించారు. నిందితుడిపై వివిధ సెక్షన్ల కింద కేసు నమోదు చేసినట్లు ఎస్పీ శరవణ వివేక్‌ తెలిపారు.