Stealing Chocolate: చోరీ వీడియో వైరల్‌.. అవమానభారంతో యువతి ఆత్మహత్య!

కోల్‌కతా: ఓ మాల్‌లో తాను చేసిన చాక్లెట్‌ల చోరీ(Stealing) ఘటన వీడియో వైరల్‌ కావడంతో.. మనస్తాపం చెందిన ఓ యువతి ఆత్మహత్యకు పాల్పడింది. పశ్చిమ బెంగాల్‌(West Bengal)లోని అలీపూర్‌ద్వార్‌ జిల్లాలో ఈ ఘటన చోటుచేసుకుంది. పోలీసులు సోమవారం కేసు వివరాలు వెల్లడించారు. డిగ్రీ మూడో సంవత్సరం చదువుతోన్న యువతి సెప్టెంబరు 29న తన సోదరితో కలిసి స్థానికంగా ఓ షాపింగ్‌ మాల్‌కు వెళ్లింది. ఈ క్రమంలోనే చాక్లెట్‌లు చోరీ చేసిందని ఆరోపిస్తూ అక్కడున్న సిబ్బంది.. ఆమె బయటకు వెళ్తుండగా పట్టుకున్నారు.

ఆ తర్వాత ఆమె చాక్లెట్లకయ్యే మొత్తాన్ని చెల్లించి, స్టోర్ యాజమాన్యానికి క్షమాపణలూ  చెప్పినట్లు ఆమె తండ్రి వెల్లడించారు. అయితే, మాల్‌లోని వ్యక్తులు ఈ మొత్తం ఘటనను వీడియో తీసి సోషల్ మీడియాలో పోస్ట్ చేయడంతో.. వైరల్‌గా మారింది. ఈ క్రమంలోనే తీవ్ర అవమానభారంతో ఆమె ఆదివారం రాత్రి ఉరేసుకుని ఆత్మహత్యకు పాల్పడింది. దీంతో ఆగ్రహానికి గురైన స్థానికులు.. ఆ మాల్‌ ఎదుట ఆందోళనకు దిగారు. వీడియో తీసి, వైరల్‌ చేసినవారిపట్ల కఠిన చర్యలు తీసుకోవాలని డిమాండ్ చేశారు. ఈ మేరకు కేసు నమోదు చేసుకుని, దర్యాప్తు చేపట్టినట్టు పోలీసులు తెలిపారు.