రిఫ్రిజిరేటర్‌ పేలి ఆరుగురి మృతి.. మృతుల్లో ముగ్గురు చిన్నారులు

చండీగడ్‌: పంజాబ్‌లోని (Punjab) జలంధర్‌ జిల్లాలో ఊహించని ప్రమాదం జరిగింది. రిఫ్రిజిరేటర్‌ (Refrigerator) కంప్రెషర్‌ పేలిన అనంతరం చెలరేగిన మంటల కారణంగా ఒకే కుటుంబానికి చెందిన ఆరుగురు మృత్యువాతపడ్డారు. ఆదివారం రాత్రి ఈ ఘటన చోటుచేసుకుంది. మృతుల్లో అభంశుభం తెలీని ముగ్గురు చిన్నారులు కూడా ఉండడం కలచివేస్తోంది. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.

ఇది పార్టీ ఖాతానా.. సీఎంఓ ఖాతానా?.. ఏపీ సీఎం కార్యాలయంపై నెటిజన్ల ఫైర్‌!

ఇంటిల్లిపాది ఆదివారం రాత్రి టీవీ చూస్తుండగా పెద్ద శబ్దంతో పేలుడు సంభవించింది. అనంతరం మంటలు చెలరేగాయి. ఆ సమయంలో ఇంట్లో ఉన్న యశ్‌పాల్‌ గాయ్‌ (70), ఆయన కుమారుడు ఇంద్రపాల్‌ (41), కోడలు రుచి గాయ్‌ (40) వారి 14 ఏళ్లలోపు వయసున్న ముగ్గురు చిన్నారులు మానస, దియా, అక్షయ్‌ మృత్యువాతపడ్డారు. ఘటనా స్థలిలోనే ఐదుగురు మృతి చెందగా.. తీవ్రంగా గాయపడిన ఇంద్రపాల్‌ను ఆస్పత్రికి తరలించారు. సోమవారం చికిత్స పొందుతూ ఆయన  మరణించారు. పేలుడుకు గల అసలు కారణం తెలుసుకునేందుకు ఫోరెన్సిక్‌ బృందం ఘటనా స్థలికి చేరుకుని శాంపిళ్లను సేకరించిందని పోలీసులు తెలిపారు.