Crime news: శామీర్‌పేటలో ఘోరం... సీసీ కెమెరాలో ప్రమాద దృశ్యాలు 

హైదరాబాద్‌: మేడ్చల్‌ జిల్లా శామీర్‌పేట బస్టాండ్‌ వద్ద ఘోర రోడ్డు ప్రమాదం జరిగింది. ఓ ద్విచక్రవాహనదారుడి ఏమరపాటు, మరో ద్విచక్రవాహన దారుడి అతివేగం ప్రమాదానికి కారణమయ్యాయి. ఓ వాహనదారుడు వెనుకవైపు చూసుకోకుండానే రోడ్డెక్కి యూటర్న్‌ తీసుకునే ప్రయత్నం చేశాడు. ఈక్రమంలో అతివేగంగా వస్తున్న మరో ద్విచక్రవాహనదారుడికి అది గమనించే అవకాశం లేకుండా పోయింది. అదే వేగంతో ఉన్నట్టుండి రోడ్డుపైకి వచ్చిన ద్విచక్రవాహనాన్ని ఢీకొట్టాడు. ఈ ప్రమాదంలో రెండు వాహనాలు తుక్కుతుక్కయ్యాయి. ఘటనలో ఒకరు మృతి చెందగా.. ఇద్దరికి తీవ్ర గాయాలయ్యాయి. ప్రమాద దృశ్యాలు రహదారిపై ఏర్పాటు చేసిన సీసీ కెమెరాలో నమోదయ్యాయి.