Train: ఎమర్జెన్సీ బ్రేక్‌తో ఆగిన రైలు.. కుదుపునకు ఇద్దరు ప్రయాణికులు మృతి

ధన్‌బాద్‌: వేగంగా వెళ్తోన్న రైలు అకస్మాత్తుగా ఆగడంతో ఆ కుదుపునకు రైలులో ప్రయాణిస్తున్న ఇద్దరు వ్యక్తులు మృతి చెందారు. ఈ ఘటన ఝార్ఖండ్‌లోని కొడెర్మా జిల్లాలో చోటుచేసుకుంది. రైల్వే అధికారులు తెలిపిన వివరాల ప్రకారం.. శనివారం పర్సాబాద్‌ సమీపంలో పూరి నుంచి న్యూదిల్లీకి వెళ్తోన్న పురుషోత్తమ్‌ ఎక్స్‌ప్రెస్‌ రైలుపై విద్యుత్‌ తీగలు తెగిపడ్డాయి. విద్యుత్‌ సరఫరా నిలిచిపోవడంతో రైలును ఆపేందుకు లోకో పైలట్‌ అత్యవసర బ్రేక్‌ వేశాడు. ఆ సమయంలో రైలు గంటకు 130 కి.మీ వేగంతో ప్రయాణిస్తోంది. అకస్మాత్తుగా బ్రేక్‌ వేయడంతో రైలు భారీ కుదుపునకు గురైంది. ఆ కుదుపునకు రైలులోని ఇద్దరు ప్రయాణికులు మృతి చెందారు. పలువురు స్వల్పంగా గాయపడ్డారు. నాలుగు గంటల తర్వాత రైలును డీజిల్‌ ఇంజిన్‌ సాయంతో గోమా రైల్వే స్టేషన్‌కు తరలించామని, అక్కడ రైలుకు ఎలక్ట్రిక్‌ ఇంజిన్‌ను జత చేసి దిల్లీకి పంపించినట్లు రైల్వే అధికారులు వెల్లడించారు.