‘వైకాపా నీచంగా ప్రవర్తిస్తోంది’

చిత్తూరు: ప్రదర్శనలో శ్రేణులకు అభివాదం చేస్తున్న మాజీ ఎమ్మెల్సీ గౌనివారి శ్రీనివాసులు, పక్కనే అమరనాథరెడ్డి, పులివర్తి నాని

పలమనేరు, న్యూస్‌టుడే: వైకాపా ప్రభుత్వం నీచంగా వ్యవహరిస్తోందని మాజీ మంత్రి అమరనాథరెడ్డి అన్నారు. శనివారం సాయంత్రం చిత్తూరు జైలు నుంచి విడుదలైన తెదేపా నాయకులకు పట్టణంలో ఘనస్వాగతం పలికారు. మార్కెట్‌ కమిటీ ఆవరణలో ఎన్టీఆర్‌ విగ్రహానికి నివాళులర్పించారు. ఆయన మాట్లాడుతూ తెదేపా నాయకులను జైలులో పెడితే భయపడతామని అనుకుంటున్నారు.. అది మీ పగటి కలగానే ఉంటుందన్నారు. చంద్రబాబునాయుడు అనుభవమంత వయసు లేని జగన్‌ అన్యాయంగా విమర్శిస్తున్నారని అన్నారు. సున్నిత మనస్కులైన గౌనివారి శ్రీనివాసులును ఈ ప్రభుత్వం దుర్మార్గంగా అరెస్టు చేసిందని మండిపడ్డారు. అక్రమ అరెస్టులకు జగన్‌మోహన్‌రెడ్డి మూల్యం చెల్లించక తప్పదని హెచ్చరించారు. తెదేపా నాయకులు, కార్యకర్తలు పెద్దఎత్తున పాల్గొన్నారు.