27 నుంచి తిరుమలలో ఒలెక్ట్రా ఎలక్ట్రిక్‌ బస్సులు

తిరుమల, న్యూస్‌టుడే: మేఘ ఇంజినీరింగ్‌ అండ్‌ ఇన్‌ఫ్రాస్ట్రక్చర్‌ లిమిటెడ్‌ (ఎంఈఐఎల్‌) ఆధ్వర్యంలోని ఒలెక్ట్రా గ్రీన్‌ టెక్‌ లిమిటెడ్‌ ఎలక్ట్రిక్‌ బస్సులను సోమవారం నుంచి తిరుమలలో నడపనున్నట్లు సమాచారం. హైదరాబాద్‌లోని కంపెనీలో ఎలక్ట్రిక్‌ బస్సులు సిద్ధం కాగా.. ఈ నెల మొదటి వారంలో తితిదే ట్రాన్స్‌పోర్ట్‌ జీఎం చిన్నచిన్న మార్పులు సూచించగా ప్రస్తుతం ఐదు బస్సులు తిరుపతిలోని తితిదే ట్రాన్స్‌పోర్ట్‌ కార్యాలయానికి చేరుకున్నాయి. మరో ఐదు త్వరలో అందించనున్నారు. ఆదివారం సాయంత్రానికి తిరుమల ట్రాన్స్‌పోర్ట్‌ విభాగానికి చేరుకుంటాయి. సోమవారం నుంచి తిరుమలలో ఉచిత విద్యుత్‌ ఎలక్ట్రిక్‌ బస్సులు అందుబాటులోకి తెచ్చేందుకు తితిదే అధికారులు చర్యలు తీసుకుంటున్నారు. తితిదే ఛైర్మన్‌ వైవీ సుబ్బారెడ్డి వీటిని ప్రారంభించనున్నారు. 25 సీట్ల కెపాసిటీతో పాటు మరో 25 మంది నిలబడేందుకు వీటిని సిద్ధం చేశారు. రెండు వైపుల ప్రయాణికులు ఎక్కేందుకు, దిగేందుకు ఆటోమెటిక్‌ తలుపులు ఏర్పాటు చేశారు. ప్రస్తుతం తిరుమలకు తిరుగుతున్న ఎలక్ట్రిక్‌ బస్సుల తరహాలో వీటిని తీర్చిదిద్దారు. సీసీ కెమెరాలు, అనౌన్స్‌మెంట్‌ ఏర్పాట్లు ఉన్నాయి. ప్రస్తుతం తిరుమలలో 12 వరకు ఉచిత ధర్మరథం బస్సులు ఉండగా.. వాటి స్థానంలో పది ఎలక్ట్రిక్‌ బస్సులు అందుబాటులోకి తెస్తున్నారు. తిరుమలలో ప్రస్తుతం ఉన్న ధర్మరథం బస్సులు తిరుపతిలో ఉపయోగించే అవకాశం ఉంది.