మతిభ్రమించే సీఎంపై పవన్‌ వ్యాఖ్యలు: మంత్రి కారుమూరి

పుంగనూరు: సీఎం జగన్‌ మోహన్‌రెడ్డిని ఏకవచనంతో విమర్శించడం, వాలంటీర్ల వ్యవస్థపై నీచమైన వ్యాఖ్యలను చూస్తుంటే.. జనసేన అధినేత పవన్‌కల్యాణ్‌కు మతిభ్రమించిదనే విషయం అర్థమవుతుందని మంత్రి కారుమూరి వెంకటనాగేశ్వరావు అన్నారు. చిత్తూరు జిల్లా పుంగనూరులో జరిగిన యాదవుల ఆత్మీయ సమ్మేళనంలో ఆయన పాల్గొన్నారు. అనంతరం విలేకర్ల సమావేశంలో మాట్లాడారు. నిత్యం ప్రజా సేవలో ఉంటూ సంక్షేమ ఫలాలు లబ్ధిదారులకు అందడంలో కీలకమైన వాలంటీర్లపై ఇష్టానుసారంగా విమర్శలు చేయడం విడ్డూరంగా ఉందన్నారు. సంక్షేమం, అభివృద్ధి రెండు కళ్లుగా సాగుతున్న జగన్‌ పాలనపై బురద జల్లే ప్రయత్నం సరికాదని హితవు పలికారు. చంద్రబాబుకు సహకరిస్తూ ప్యాకేజీ స్టార్‌గా మారిన పవన్‌కు సేవచేయాలనే ఆలోచన లేదన్నారు. పవన్‌ వ్యాఖ్యలపై సొంత సామాజిక వర్గం నుంచే వ్యతిరేకత వస్తుందన్నారు. ఎంపీ మిథున్‌రెడ్డి, ఎమ్మెల్సీలు రమేష్‌యాదవ్‌, భరత్‌, ఎమ్మెల్యే వెంకటేగౌడ, జడ్పీ ఛైర్మన్‌ శ్రీనివాసులు పాల్గొన్నారు.