వైకాపా అభ్యర్థి అర్ధనగ్న ప్రదర్శన

చిత్తూరు వన్‌టౌన్‌ స్టేషన్‌ ముందు నిరసన తెలుపుతున్న వైకాపా అభ్యర్థి విజయానందరెడ్డి

చిత్తూరు (నేరవార్తలు, జిల్లా పంచాయతీ), న్యూస్‌టుడే: నగదు పంచుతున్న వారిని అడ్డుకోవాలని చిత్తూరు ఒకటో పట్టణ పోలీసు స్టేషన్‌ ఎదుట వైకాపా అభ్యర్థి విజయానందరెడ్డి అర్ధనగ్న ప్రదర్శన చేశారు. ఆయన మాట్లాడుతూ తెదేపా నాయకులు నగదు పంచుతున్నారని, స్వయంగా తామే పట్టించినా పోలీసులు వదిలేస్తున్నారన్నారు. పోలీసుల వైఖరిని ఖండిస్తూ నిరసన తెలిపారు. తెదేపా నాయకులు బెంగళూరు, అనంతపురం జిల్లాల నుంచి మనుషులను రప్పించారని, వారిని పంపేయాలన్నారు. చిత్తూరు వన్‌టౌన్‌ సీఐ విశ్వనాథరెడ్డి, ఎస్సై షేక్‌షావళి ఆయనకు నచ్చజెప్పడంతో నిరసన విరమించారు. మరోవైపు వైకాపా నాయకుల సూచనలతో పోలీసులు.. తెదేపా కూటమి అభ్యర్థి గురజాల జగన్మోహన్‌ అనుచరులు బస చేస్తున్న భరత్‌నగర్‌లోని ఇంట్లో నగదు ఉందంటూ తనిఖీలు చేశారు. అక్కడ ఏమీ లేకపోవడంతో పోలీసులు వెళ్లిపోయారు. వైకాపాకు చెందిన వారు అక్కడే ఉండటంతో వైకాపా, తెదేపా వర్గీయుల మధ్య వాగ్వాదం చోటుచేసుకుంది. ఎవరూ తగ్గకపోవడంతో కొద్దిసేపు వాదించుకుని వెళ్లిపోయారు.