యువకుడిపై బాలుడు కత్తితో దాడి

వెదురుకుప్పం: మండల పరిధి బ్రాహ్మణపల్లెకి చెందిన ఓబాలుడు(14) తల్లితో పాటు తిరుపతిలో ఉంటూ జులాయిగా తిరిగేవాడు. స్థానిక ఎస్సీకాలనీకి చెందిన విజయకుమార్‌(24) డిగ్రీ పూర్తి చేసి ఇంటి వద్ద ఉంటున్నాడు. ఒకే వీధిలో ఉంటున్న ఈ ఇరువురు స్నేహితులు. ఓ యువతితో ఉన్న సాన్నిహిత్యం వారి మధ్య తగవుకు కారణమైందని, గతంలో వారి మధ్య రాజీ కుదర్చడానికి గ్రామ పెద్దలు సైతం ప్రయత్నించినట్లు సమాచారం. ఈ క్రమంలో మంగళవారం ఉదయం బాలుడి తల్లితో.. ఆ యువకుడు విజయకుమార్‌ తన లావాదేవీల గురించి మాట్లాడుతుండగా, బాలుడు తన వద్ద ఉన్న కత్తితో యువకుడిపై దాడి చేసి గాయపరిచాడని, వెంటనే అతడిని చితకబాది పోలీసులకు అప్పగించామని గ్రామస్థులు తెలిపారు. గాయపడిన యువకుడిని తిరుపతి రుయాకు తరలించి చికిత్స అందిస్తున్నామన్నారు. పోలీసులు కేసు నమోదు చేసి దర్యాప్తు చేస్తున్నారు.