జాతీయ రహదారిపై వంట నూనె మాఫియా

చిన్న కొత్తపల్లి కేంద్రంగా దిగుమతి.. అల్పాహారశాలలే లక్ష్యం

 చిన్నకొత్తపల్లి డొంక వద్ద ఆయిల్‌ దిగుమతి

 అద్దంకి, న్యూస్‌టుడే: జాతీయ/రాష్ట్రీయ రహదారుల వెంబడి నిర్వహించే అల్పాహారశాలలు, భోజనశాలల్లో ఉపయోగించే నూనె (ఆయిల్‌) సరఫరాలో కల్తీ పెద్దఎత్తున జరుగుతున్నట్లు సమాచారం. ఈ రకం నూనెను కోళ్లకు పౌష్టికాహారం అందించేవారు ఉపయోగిస్తున్నారు. బహిరంగ మార్కెట్‌ కంటే ఇది తక్కువ ధరకు అందుబాటులో ఉండటంతో దీనికి మంచి గిరాకీ ఉంది. గతంలో జాతీయ రహదారులపై డీజిల్‌, పెట్రోలు ఉత్పత్తుల్ని తక్కువ ధరకు విక్రయించేవారు. వాటి స్థానంలో కిరోసిన్‌ను నింపుకొని వాహనాలు నడిచేవి. కిరోసిన్‌ సరఫరా తగ్గడంతో ఈ తరహా వ్యాపారం నిర్వహించేవారు తక్కువ ధరకు నూనెను కొనుగోలు చేయడం, దానిని అల్పాహార/భోజనశాలలకు విక్రయించే పనుల్లో మునిగిపోయారు. నామ్‌ రహదారిపై అద్దంకి మండలం చిన్నకొత్తపల్లి డొంక కేంద్రంగా కల్తీ నూనె వ్యాపారం జోరుగా సాగుతున్నట్లు సమాచారం.