సాంకేతిక లోపంతో ఆగిన మెట్రో

ఈనాడు, హైదరాబాద్‌: సాంకేతిక లోపంతో జూబ్లీహిల్స్‌ చెక్‌పోస్ట్‌ స్టేషన్‌లో బుధవారం ఉదయం  15 నిమిషాలపాటు మెట్రోరైలు ఆగింది. ఉదయం కార్యాలయాలకు హడావుడిగా వెళ్లే సమయంలో పావుగంట నిలిచిపోవడంతో ప్రయాణికులు కొంత ఇబ్బంది పడ్డారు. ఆ తర్వాత సమస్యను పరిష్కరించడంతో యథావిధిగా మెట్రోరైళ్లు నడిచాయి.

క్రికెట్‌ సందర్భంగా అర్ధరాత్రి వరకు.. : ఉప్పల్‌ స్టేడియంలో బుధవారం జరిగిన ఐపీఎల్‌ మ్యాచ్‌ సందర్భంగా ప్రయాణికుల సౌకర్యార్థం మెట్రోరైలు వేళల్ని అర్ధరాత్రి వరకు నడిచాయి. సాధారణంగా రాత్రి 11 గంటలకే నడుస్తాయి. మ్యాచ్‌ ముగిశాక ప్రేక్షకులు గమ్యస్థానాలకు చేరుకునేందుకు వీలుగా టర్మినల్‌ స్టేషన్‌ నుంచి చివరి మైట్రోరైళ్లు 12.15 గంటలకు బయలుదేరాయి. నాగోల్‌, ఉప్పల్‌, స్టేడియం, ఎన్‌జీఆర్‌ఐ స్టేషన్ల నుంచే ఈ సదుపాయం కల్పించారు. చివరి స్టేషన్‌కు 1.10 గంటలకు చేరుకునేలా ఏర్పాట్లు చేశారు.