ప్రధాని నరేంద్రమోదీని కలిసిన డాక్టర్‌ రఘురాం

రాజ్‌భవన్‌లో పీఎం నరేంద్రమోదీతో డాక్టర్‌ రఘురాం దంపతులు
ఈనాడు, హైదరాబాద్‌: కిమ్స్‌- ఉషాలక్ష్మి రొమ్ము కేన్సర్‌ చికిత్స కేంద్రం డైరెక్టర్‌, ప్రముఖ కేన్సర్‌ వైద్యుడు డాక్టర్‌ రఘురాం ప్రధాన మంత్రి నరేంద్ర మోదీని మంగళవారం ఇక్కడ రాజ్‌భవన్‌లో మర్యాద పూర్వకంగా కలిశారు. ఈ సందర్భంగా దేశంలో పెరుగుతున్న రొమ్ము కేన్సర్‌, చికిత్సలు ఇతర అంశాలపై ఇద్దరి మధ్య చర్చకు వచ్చినట్లు డాక్టర్‌ రఘురాం బుధవారం మీడియాకు తెలిపారు. వైద్య చికిత్సలకు డబ్బు వెచ్చించలేని ఎంతోమంది పేదలు, వృద్ధులు, ఇతర వర్గాలకు ఆయుష్మాన్‌ భారత్‌ పథకం అండగా నిలుస్తోందని పీఎం దృష్టికి తీసుకెళ్లారు. నేషనల్‌ హెల్త్‌ మిషన్‌ (ఎన్‌హెచ్‌ఎం)లో భాగంగా దేశ వ్యాప్తంగా ముఖ్యంగా గ్రామీణ మహిళలకు స్క్రీనింగ్‌ ద్వారా ముందే రొమ్ము కేన్సర్‌ను గుర్తించవచ్చునని, బ్రెస్ట్‌ కేన్సర్‌ రిజిస్ట్రీ కోసం కూడా ఉపయోగపడుతుందని వివరించారు. ఉషాలక్ష్మి బ్రెస్ట్‌ కేన్సర్‌ ఫౌండేషన్‌ ఆధ్వర్యంలో వెలువడే హెల్త్‌ మ్యాగజైన్‌ ‘పింక్‌ కనెక్షన్‌’ ఎడిటోరియల్‌ పేజీపై ప్రధాని ఆటోగ్రాఫ్‌ చేసి డాక్టర్‌ రఘురాంను అభినందించారు. డాక్టర్‌ వైజయంతి వెంట ఉన్నారు.