జాతీయ ఫుట్‌బాల్‌ రెఫరీలుగా ఎంపిక

బెంగళూరు (క్రీడలు), న్యూస్‌టుడే: కర్ణాటకకు చెందిన హర్షసైని, పూజా జాతీయ రెఫరీలుగా అర్హత పొందారని ఫుట్‌బాల్‌ సంఘం రెఫరీస్‌ కమిటీ ప్రకటించినట్టు రాష్ట్ర ఫుట్‌బాల్‌ సంఘం తెలిపింది. రెండేళ్ల పరధిలో తొలిసారిగా ఇద్దరు మహిళలు రెఫరీలుగా అర్హత పొందడం విశేషం. ఈ నెల 11న గ్వాలియర్‌లో జరిగిన క్యాటగిరీ-2 అప్‌గ్రేడ్‌కు సంబంధించిన రాత పరీక్షల్లో హర్షసైని, పూజ ఉత్తీర్ణులైనట్టు అఖిల భారత రెఫరీ సమాఖ్య ప్రకటించింది. 2017లో హర్షసైని, పూజ తమ రెఫరీ వృత్తిని ప్రారంభించారు. 2020-21 రెఫరీలో ఎంఏ కోర్సు చేసిన వీరిద్దరూ ఇండియన్‌ మహిళల లీగ్‌ క్వాలీఫైర్‌ పోటీలు, మహిళల సూపర్‌ డివిజన్‌, ఏ డివిజన్‌ ఫుట్‌బాల్‌ మ్యాచ్‌లు, పురుషుల విభాగంలో నిర్వహించిన ఏబీసీ డివిజన్‌ పోటీలు, కర్ణాటక ఫుట్‌బాల్‌ సంఘం నిర్వహించిన యూత్‌ లీగ్‌ పోటీల్లో రెఫరీలుగా వ్యవహరించారు. వీరిద్దరూ జాతీయ రెఫరీలుగా అర్హత పొందడంపై కర్ణాటక ఫుట్‌బాల్‌ సంఘం హర్షం వ్యక్తం చేసింది.