మూగబోయిన కరావళి కోకిల

 భాగవత సుబ్రహ్మణ్య ధారేశ్వర

ఉడుపి, న్యూస్‌టుడే : ‘కరావళి కోకిల’గా గుర్తింపు పొందిన యక్షగాన భాగవత సుబ్రహ్మణ్య ధారేశ్వర (67) గురువారం వేకువజామున బెంగళూరులో తుది శ్వాస విడిచారు. ఉడుపి జిల్లా కుందాపుర తాలూకా నాగూరులోని ఆయన నివాసం ఆవరణలో గురువారం సాయంత్రం అంత్యక్రియలు నిర్వహించారు. యక్షగాన ప్రదర్శనలో భాగవత కళాకారులదే ప్రధాన పాత్ర. ఆయా పాత్రలకు తగినట్లు పాటలు పాడుతూ వ్యాఖ్యానాన్ని చెబుతారు. సుమారు 46 ఏళ్ల పాటు యక్షగాన ప్రదర్శనలకు ధారేశ్వర సేవలందించారు. ఆయన స్వరం అందించిన యక్షగాన ప్రదర్శనలకు సంబంధించి 400కు పైగా ఆడియో సీడీలు, క్యాసెట్లు మార్కెట్లో ఉన్నాయి. కోటె అమృతేశ్వరి మేళాలో, పెర్డూరు మేళాలో ప్రధాన భాగవతగా ఆయన పాల్గొంటూ వచ్చారు. కర్ణాటక రాజ్యోత్సవ పురస్కారంతో పాటు పలు అవార్డులు ఆయన అందుకున్నారు. ఆయన మృతికి ముఖ్యమంత్రి సిద్ధరామయ్య, స్పీకర్‌ యూటీ ఖాదర్‌, మాజీ మంత్రి కోటా శ్రీనివాస పూజారి తదితరులు సంతాపాన్ని ప్రకటించారు.