మోదీని ప్రశ్నించలేని జోషి

సీఎం సిద్ధరామయ్య ఎద్దేవా 

కాంగ్రెస్‌లో చేరిన నేతలకు పతాకాన్ని అందిస్తున్న   ముఖ్యమంత్రి సిద్ధరామయ్య

హుబ్బళ్లి, న్యూస్‌టుడే : హుబ్బళ్లి-ధార్వాడ లోక్‌సభ నియోజకవర్గంలోని ప్రజలు ఈసారి మార్పు కోరుకుంటున్నారని ముఖ్యమంత్రి సిద్ధరామయ్య పేర్కొన్నారు. కాంగ్రెస్‌ అభ్యర్థి వినోద్‌ అసోటిని భారీ మెజార్టీతో గెలిపించాలని ఓటర్లను, స్థానిక నాయకులను కోరారు. కర్ణాటకకు రావలసిన పన్ను వాటా విషయంలో కేంద్ర మంత్రి, స్థానిక భాజపా అభ్యర్థి ప్రహ్లాద్‌ జోషి ద్రోహానికి పాల్పడ్డారని ఆరోపించారు. శిగ్గావ్‌ సమీపంలోని తడస క్రాస్‌ వద్ద గురువారం నిర్వహించిన బహిరంగ సభలో అసోటికి మద్దతుగా నిర్వహించిన సభలో సిద్ధు మాట్లాడారు. శ్రీమంతులు, పారిశ్రామికవేత్తలకు రూ.16 లక్షల కోట్ల రుణాలను మాఫీ చేసిన ప్రధాని మోదీ, ధార్వాడకు ఏం మేలు చేశారని ప్రశ్నించారు. మోదీ చేసిన అన్యాయాన్ని ప్రహ్లాద్‌ జోషి ఒక్కసారీ ప్రశ్నించలేదని తప్పుబట్టారు. కర్ణాటకకు 15వ ఆర్థిక సంఘం నుంచీ వంచన జరిగిందన్నారు. కరవు పరిస్థితులు ఉన్నప్పుడు పరిహారాన్ని విడుదల చేయాలని కోరుతూ సర్వోన్నత న్యాయస్థానాన్ని ఆశ్రయించవలసి వచ్చిందన్నారు. ప్రహ్లాద్‌ జోషిని ఓడిస్తామని వేదికపై ఉన్న మంత్రి సంతోశ్‌ లాడ్‌, ఎమ్మెల్యేలు కోనరెడ్డి, వినయ్‌ కులకర్ణి, ఎమ్మెల్సీ సలీం అహ్మద్‌, స్థానిక నాయకులు యాసిర్‌ ఖాన్‌ పఠాన్‌, సోమణ్ణ బేవినమర, అజీం పీర్‌ ఖాద్రి తదితరులు శపథం చేశారు.