పత్రకళలో ఎనలేని తృప్తి

పనస ఆకులపై జాతీయ గీతం

కార్వార, న్యూస్‌టుడే : లీఫ్‌ ఆర్ట్‌.. ఇటీవలి కాలంలో ఔత్సాహికులను విశేషంగా ఆకర్షిస్తున్న కళగా ప్రాచుర్యం పొందింది. ఇతర కళలకు ప్రత్యేక ఏర్పాట్లు అవసరం. పత్ర కళకు అలాంటి ఇబ్బంది ఎంతమాత్రం ఉండదు. కాసిన్ని ఆకులు లభిస్తేసరి! కళ్లముందు కోరుకున్న ఆకారంలో సాక్ష్కాత్కరిస్తుంది. ఉత్తర కన్నడ జిల్లా సిద్ధాపుర తాలూకా బీళగి సమీపంలోని హొసమంజు గ్రామానికి చెందిన తృప్తి మంజునాథ్‌ అనే యువతి జాతీయ గీతాన్ని లీఫ్‌ ఆర్ట్‌ ద్వారా ఎనిమిది పనస ఆకుల్లో చెక్కారు. దీనికి ఇండియా బుక్‌ ఆప్‌ రికార్డ్స్‌లో చోటు లభించింది. యల్లాపురలో డిగ్రీ చదివే దశలోనే ఈకళపై ఆసక్తిని పెంచుకున్నట్లు ఆమె తెలిపారు. స్నాతకోత్తర కోర్సును పూర్తి చేసుకుని బీఎడ్‌ చదువుతున్న సమయంలో పత్రకళను నిర్లక్ష్యం చేయకుండా కొనసాగిస్తున్నానని చెప్పారు. గత మార్చి 19న ఎనిమిది పనస ఆకులపై చెక్కిన జాతీయ గీతానికి పురస్కారం లభించడంతో మరింత ఉత్సాహం కలుగుతోందన్నారు. రాబోయే కాలంలో మరిన్ని ప్రముఖ ఘట్టాల్ని ఆకులపై చెక్కనున్నట్లు వెల్లడించారు.