‘ఎర్లీబర్డ్‌’ రాబడి రూ.15.15 కోట్లు

ఖమ్మం కార్పొరేషన్‌, న్యూస్‌టుడే: ఐదు శాతం రాయితీతో ఆస్తిపన్ను చెల్లింపునకు పురపాలక శాఖ అవకాశం కల్పించిన నేపథ్యంలో ఉభయ జిల్లాల్లోని నగర, పురపాలికల్లో ప్రజల నుంచి మంచి స్పందన లభించింది. ఈ అవకాశాన్ని 26,646 మంది భవన యజమానులు వినియోగించుకున్నారు. తద్వారా ఆయా నగర, పురపాలికలకు రూ.15.15 కోట్ల ఆదాయం సమకూరింది. అత్యధికంగా ఖమ్మం నగరపాలక సంస్థకు రూ.9.73 కోట్లు రాగా అత్యల్పంగా ఇల్లెందు పురపాలిక రూ.30 లక్షలు వసూలు చేసింది. ఈనెల మొదటి వారంలో ఈ పథకాన్ని పురపాలక శాఖ ప్రకటించింది. ఇదే సమయంలో సిబ్బంది ఎన్నికల విధులు, పన్నుల వసూలు చేపట్టడంతో తొలుత మందకొడిగా సాగింది. తరువాత దీనిపై ప్రచారాన్ని ముమ్మరం చేయడం, పట్టణవాసులు స్పందించడంతో ఆశించిన మేరకు పన్నులు వసూలయ్యాయి. ఉన్నతాధికారులు  నిర్దేశించిన లక్ష్యాలకు అనుగుణంగా రెవెన్యూ సిబ్బంది క్షేత్రస్థాయిలో పన్నులు వసూలు చేయగలిగారు.