వైభవంగా రాములోరికి అభిషేకం

భద్రాచలం: భద్రాచలం రామాలయ క్యూలైన్లు ఆదివారం భక్తులతో కిటకిటలాడాయి. ప్రధాన కోవెలలో అర్చకులు సుప్రభాత సేవ చేసి అభిషేక మహోత్సవాన్ని కొనసాగించారు. మూలవిరాట్‌కు బంగారు పుష్పాలతో అర్చన చేశారు. వారానికి ఒక్కసారి ఉండే క్రతువు కావడంతో విశేష సంఖ్యలో తరలివచ్చి దేవదేవుడ్ని దర్శించుకున్నారు. క్షేత్ర విశిష్టత పరమానందాన్ని కలిగించగా వైష్ణవ సంప్రదాయం ప్రకారం విష్వక్సేన పూజ, పుణ్యాహవాచనం కొనసాగించారు. వధూవరుల గోత్ర నామాలను చదివి ప్రవర పఠించారు. మాంగల్యధారణ, తలంబ్రాల వేడుక, దర్బారు సేవ భక్తులను తన్మయత్వంలో ముంచెత్తాయి. సోమవారం ముత్తంగి రూపంలో స్వామివారు దర్శనమీయనున్నారు.