రామాలయ అభివృద్ధిపై మంత్రి తుమ్మల సమాలోచనలు

రంగనాయకుల గుట్ట నుంచి రామాలయ పరిసరాలను పరిశీలిస్తున్న మంత్రి తుమ్మల నాగేశ్వరరావు, ఎమ్మెల్యే తెల్లం వెంకట్రావు తదితరులు

భద్రాచలం, న్యూస్‌టుడే: భద్రాచలం రామాలయ అభివృద్ధికి అవసరమైన అన్ని చర్యలు చేపట్టాలని వ్యవసాయ శాఖ మంత్రి తుమ్మల నాగేశ్వరరావు స్థానిక ప్రజాప్రతినిధులకు సూచించారు. సోలార్‌ విద్యుత్తును సద్వినియోగం చేసుకోవాలని తెలిపారు. గురువారం ఇక్కడ పర్యటించిన ఈయన రంగనాయకులగుట్ట నుంచి ఆలయ పరిసరాలను పరిశీలించారు. అయోధ్య తరహాలో అన్ని వసతులు కల్పించి దక్షిణ అయోధ్యగా పేరుగాంచిన భద్రాచలం ఆలయాన్ని అభివృద్ధి   చేస్తామన్నారు. ఎలాంటి పనులు చేస్తే భక్తులకు సౌకర్యంగా ఉంటుందో సమాలోచనలు జరిపారు. 50 ఇళ్లను తొలగించి ఆలయ ప్రాకారాలు,   మాడ వీధిని విస్తరించాలని అధికారులు భావిస్తున్నారు. దీనిపై సర్వేలు పూర్తయ్యాయి. ఈ నేపథ్యంలో రంగనాయకులగుట్ట, ధ్యాన మందిరం పరిసరాల నుంచి దేవస్థానం వ్యూ పాయింట్‌ను మంత్రి పరిశీలించారు. గోదావరి వరదల నుంచి భద్రాచలానికి రక్షణగా కరకట్టను విస్తరించే అంశంపై ఎమ్మెల్యే తెల్లం వెంకట్రావు, కాంగ్రెస్‌ నాయకులు తోటకూర రవిశంకర్‌, రసూల్‌, యశోద రాంబాబుతో చర్చించారు. లోతట్టు ప్రాంతాల్లో పరిస్థితిని అడిగి తెలుసుకున్నారు.