పది ఫలితాల్లో బాలికలదే పైచేయి

పది పరీక్షలు రాసివస్తున్న విద్యార్థులు (పాతచిత్రం)
గద్వాల అర్బన్‌, న్యూస్‌టుడే: రాష్ట్ర వ్యాప్తంగా మంగళవారం విడుదలైన పదో తరగతి ఫలితాల్లో జోగులాంబ గద్వాల జిల్లా 81.38 శాతంతో ఉత్తీర్ణత సాధించి రాష్ట్రంలో 32వ (చివరి నుంచి రెండో) స్థానంలో నిలిచింది. 7,175 మంది విద్యార్థులు పరీక్షకు హాజరు కాగా 5,839 మంది ఉత్తీర్ణులయ్యారు. 3,512 మంది బాలురకు 78.67 శాతంతో 2,763 మంది, 3,663 మంది బాలికలకు 83.97 శాతంతో 3,076 మంది ఉత్తీర్ణులయ్యారు. జిల్లాలోని 161 పాఠశాలలకు 25 పాఠశాలల్లో నూరు శాతం ఫలితాలు నమోదయ్యాయి. 34 మంది విద్యార్థులు 10 జీపీఏ సాధించినట్టు జిల్లా విద్యాశాఖాధికారి ఇందిర, పరీక్షల అసిస్టెంట్‌ కమిషనర్‌ శ్రీనివాసులు తెలిపారు. గతేడాది ఫలితాలతో పోలిస్తే ఉత్తీర్ణతా శాతం పెరిగినా స్థానం దిగజారింది. 27 స్థానం నుంచి 32కు పడిపోయింది.