7, 8 తేదీల్లో మాక్‌ పోలింగ్‌పై శిక్షణ

అవగాహన కల్పిస్తున్న కలెక్టర్‌ వల్లూరు క్రాంతి, చిత్రంలో అదనపు కలెక్టర్‌ చంద్రశేఖర్‌, శిక్షణ ఐఏఎస్‌ అధికారి మనోజ్‌

సంగారెడ్డి టౌన్‌, న్యూస్‌టుడే: ఎన్నికల విధులు సక్రమంగా నిర్వహించాలని కలెక్టర్‌ వల్లూరు క్రాంతి పేర్కొన్నారు. బుధవారం కలెక్టరేట్‌లో పోలింగ్‌ అధికారులు, సహాయ పోలింగ్‌ అధికారులకు నిర్వహించిన శిక్షణ కార్యక్రమంలో ఆమె పాల్గొని మాట్లాడారు. ఈ నెల 6, 7 తేదీల్లో అదనపు పోలింగ్‌ సిబ్బందికి శిక్షణ కార్యక్రమాలు నిర్వహించనున్నట్లు పేర్కొన్నారు. ఇంటి నుంచి ఓటు కోసం దరఖాస్తు చేసుకున్న వారికి ఈనెల 2, 3 తేదీల్లో ఓటు వేయించేందుకు ఇప్పటికే సిబ్బందిని నియమించామన్నారు. ఎన్నికల విధుల పట్ల నిర్లక్ష్యం వహిస్తే సహించేదిలేదని హెచ్చరించారు. మాక్‌ పోలింగ్‌పై ఈనెల 7, 8 తేదీల్లో శిక్షణ ఇవ్వనున్నట్లు పేర్కొన్నారు. శిక్షణ కార్యక్రమాలను సిబ్బంది సద్వినియోగం చేసుకోవాలని, సందేహాలుంటే నివృత్తి చేసుకోవాలని సూచించారు. కార్యక్రమంలో అదనపు కలెక్టర్‌ చంద్రశేఖర్‌, శిక్షణ ఐఏఎస్‌ అధికారి మనోజ్‌ తదితరులు పాల్గొన్నారు.