నగదు చోరీపై కేసు నమోదు

నెల్లూరు (నేర విభాగం), న్యూస్‌టుడే: బాంకు నుంచి తీసుకున్న రూ.10 లక్షల నగదు బీరువాలో భద్రపరిచిన గంట వ్యవధిలో చోరీకి గురైన ఘటనపై దర్గామిట్ట పోలీసులు బుధవారం కేసు నమోదు చేశారు. పోలీసులు తెలిపిన వివరాల మేరకు.. పోస్టల్‌ కాలనీలో ఉండే వెంకటరెడ్డి అనే ఉపాధ్యాయుడు అప్పులు తీర్చేందుకు గత నెల 12వ తేదీ బ్యాంకు నుంచి రూ.10 లక్షలు నగదుతీసుకొని ఇంట్లోని బీరువాలో భద్రపరిచారు. మిద్దెపై కాపురం ఉంటున్న తోడల్లుడు ఇంట్లోకి వెళ్లి గంటసేపు వారితో మాట్లాడి తిరిగి వచ్చి చూడగా బీరువాలో రూ.10 లక్షల నగదు కనిపించలేదు.  ఈ సంఘటనపై బుధవారం దర్గామిట్ట పోలీసులకు బాధితుడు ఫిర్యాదు చేశారు. తమ ఇంట్లో పనిచేసే పని మనిషిపై అనుమానంగా ఉందని ఫిర్యాదులో పేర్కొన్నారు. ఇన్‌స్పెక్టర్‌ సీహెచ్‌ సీతారామయ్య కేసు దర్యాప్తు చేస్తున్నారు.