ఉత్తమ గ్రామ పంచాయతీగా కుకునూరుకు అవార్డు

మంత్రులు కేటీఆర్‌, ఎర్రబెల్లి దయాకర్‌రావు చేతుల మీదుగా అవార్డు అందుకుంటున్న సర్పంచి విజయ

కుకునూర్‌(వేల్పూర్‌), న్యూస్‌టుడే: రాష్ట్ర ఉత్తమ గ్రామ పంచాయతీ అవార్డును మంత్రులు కేటీఆర్‌, ఎర్రబెల్లి దయాకర్‌రావు చేతుల మీదుగా హైదరాబాద్‌లో వేల్పూర్‌ మండలం కుకునూర్‌ సర్పంచి విజయ శుక్రవారం అందుకున్నారు. 2021- 22 ఏడాదికి గాను రాష్ట్రస్థాయిలో ఉత్తమ గ్రామ పంచాయతీలను 9 అంశాల ప్రాతిపదికన పురస్కారాలివ్వాలని నిర్ణయించిన విషయం తెలిసిందే. అందులో భాగంగా జిల్లా నుంచి కుకునూర్‌ పంచాయతీ నీటి సమృద్ధిలో ఈ అవార్డును సాధించింది. రాష్ట్ర ఉత్తమ పంచాయతీగా కుకునూర్‌ ఎంపికవడం సంతోషంగా ఉందని సర్పంచి పేర్కొన్నారు. జిల్లా పంచాయతీ అధికారి జయసుధ పాల్గొన్నారు.