Anaconda: తొమ్మిది పిల్లలకు జన్మనిచ్చిన అనకొండ

భువనేశ్వర్‌ అర్బన్‌, న్యూస్‌టుడే: భువనేశ్వర్‌లోని నందన్‌కానన్‌ జంతు ప్రదర్శనశాలలో ఉన్న అనకొండ 9 పిల్లలకు జన్మనిచ్చింది. రాష్ట్రంలో అనకొండకు పిల్లలు జన్మించడం ఇదే తొలిసారి. నందన్‌కానన్‌ అధికారులు తెలిపిన ప్రకారం.. 2019లో చెన్నైలోని మొసళ్ల పార్కు నుంచి 8 పసుపు రంగు అనకొండలను నందన్‌కానన్‌ జూకు తీసుకొచ్చారు. అనంతరం ఒడిశా యూనివర్సిటీ ఆఫ్‌ అగ్రికల్చరల్‌ టెక్నాలజీ సంస్థ (ఓయూఏటీ), జూ అధికారులు కలిసి అనకొండల సంతతి పెంచేందుకు ప్రయత్నాలు ప్రారంభించారు. తాజాగా ఆ ప్రయత్నం ఫలించిందని తెలిపారు. గురువారం అనకొండ ఓ పిల్లకు జన్మనిచ్చింది. అనంతరం అనారోగ్యానికి గురైంది. కడుపు పొంగిపోవడంతో వైద్యులు, ఓయూఏటీ నిపుణులు చికిత్స ప్రారంభించారు. పాము పొట్టలో పిల్లలు ఉన్నట్లు గుర్తించి అవి సురక్షితంగా బయటకు వచ్చేందుకు చర్యలు ప్రారంభించారు. శుక్రవారం 9 పిల్లలు జన్మించగా వాటిలో ఒకటి మృతి చెందిందని అధికారులు తెలిపారు. చెన్నై నుంచి తీసుకొచ్చిన వాటిలో మూడు మృతి చెందాయని పేర్కొన్నారు.