తరలింపు వాహనం ఢీకొని యువకుడికి తీవ్ర గాయాలు

ఆసుపత్రిలో చికిత్స పొందుతున్న దిలీప్‌

బొబ్బిలి, న్యూస్‌టుడే: నామినేషన్‌ ఘట్టానికి వైకాపా కార్యకర్తలను తరలించిన ఆటో ద్విచక్ర వాహనంపై వెళ్తున్న యువకుడు రాజాన దిలీప్‌ను ఢీకొనడంతో తీవ్రంగా గాయపడిన ఘటన శుక్రవారం చోటుచేసుకుంది. ఏఎస్‌ఐ భాస్కరరావు వివరాల మేరకు.. రంగరాయపురం గ్రామానికి చెందిన రాజాన దిలీప్‌ పార్సిల్‌ ఏజెన్సీలో డెలివరీ బాయ్‌గా పనిచేస్తున్నారు. ఆయన కళాభారతి పక్కన సందులో నుంచి వస్తుండగా చర్చిసెంటర్‌ వైపు వెళ్తున్న ఆటో ఢీకొంది. ప్రమాదంలో యువకుడు తీవ్రంగా గాయపడ్డాడు. వైకాపా కార్యకర్తలను దించి, వెళ్తుండగా ఈ ఘటన జరిగినట్లు తెలుస్తోందని ఏఎస్‌ఐ అన్నారు. యువకుడికి స్థానిక ఆసుపత్రిలో ప్రాథమిక చికిత్స అందించి వైద్యులు విజయనగరం రిఫర్‌ చేశారు. ఈ మేరకు కేసు నమోదు చేసి, ఆటో డ్రైవర్‌ ఎం.సింహాచలంను అరెస్టు చేసినట్లు పోలీసులు తెలిపారు.